इंडिया दर्पण ऑनलाईन डेस्क – मनोरंजन विश्वाचं आकर्षण सगळ्यांनाच असतं. याच झगमगत्या दुनियेचा भाग होण्यासाठी अनेकजण प्रयत्नशील असतात. त्यातील काहीजणांनाच यात यश मिळतं. या दुनियेबद्दल अनेक वाईट गोष्टी जरी नेहेमी कानावर पडत असल्या तरी याचं आकर्षण एवढा जबरदस्त आहे की, तरुण – तरुणी इथे येण्यापासून स्वतःला थांबवू शकत नाहीत. अशाच एका ध्येयवेड्या तरुणाची कथा सांगणारा एक चित्रपट लवकरच प्रेक्षकांच्या भेटीला येतो आहे.
या विषयावर प्रकाश टाकणारा ‘सातारचा सलमान’ हा सिनेमा लवकरच प्रेक्षकांच्या भेटीला येणार आहे. नुकताच या सिनेमाचा ट्रेलर रिलीज झाला आहे. ‘स्वप्नं बघितली तरंच पूर्ण होतात’, अशी भावना असणाऱ्या तरुणाची हिरो बनण्याची जिद्द, त्यासाठीची त्याची धडपड या सिनेमात प्रेक्षकांना पाहायला मिळणार आहे. हा सिनेमा ३ मार्चला प्रेक्षकांच्या भेटीला येणार आहे.
साताऱ्यात राहणारा एक सामान्य मुलगा हिरो बनण्याचे स्वप्न बघतो आहे. ते स्वप्न पूर्ण करण्यासाठी तो घेत असलेली मेहनत, सामान्य मुलगा ते अभिनेता बनण्यापर्यंतचा त्याचा खडतर प्रवास, या प्रवासात त्याच्या जवळच्यांनी केलेली मदत या विषयावर हा चित्रपट बेतलेला आहे. ट्रेलरमध्येही याची झलक दिसते. आपलं स्वप्न पूर्ण करण्याच्या मार्गावर त्याच्या आयुष्यात आलेल्या अडचणी त्याला कोणत्या वळणावर नेणार आणि त्याच्या समोर आलेली परिस्थिती त्याला खरंच हिरो बनवणार का, याचं उत्तर शोधण्यासाठी प्रेक्षकांना ‘सातारचा सलमान’ हा चित्रपट पहावा लागणार आहे.
‘झिम्मा’ फेम हेमंत ढोमे या चित्रपटाचे दिग्दर्शक आहेत. त्यामुळे एक चांगली कलाकृती बघायला मिळेल, असा प्रेक्षकांना विश्वास आहे. तर चित्रपटात, सुयोग गोऱ्हे, शिवानी सुर्वे, सायली संजीव, अक्षय टंकसाळे, मकरंद देशपांडे, आनंद इंगळे यांच्या प्रमुख भूमिका आहेत. तर महेश मांजरेकर, जितेंद्र जोशी, सई ताम्हणकर, अनिकेत विश्वासराव, नेहा महाजन, कमलेश सावंत हे देखील पाहुणे कलाकार म्हणून झळकणार आहेत.
उभा चित्रपटाबद्दल माहिती देताना हेमंत ढोमे म्हणतो, प्रत्येक जण आयुष्यात मोठं होण्याचं स्वप्न बघत असतो. या प्रवासात प्रत्येकाच्याच वाटेवर अनेक अडचणी येतात. कधीकधी आता सगळं संपलं, अशीही भावना निर्माण होते. मात्र वाईट काळातही आपण सकारात्मक राहिलं पाहिजे आणि आयुष्यात पुढे गेलं पाहिजे. आयुष्यात आशावादी आणि सकारात्मक राहणे खूप गरजेचं आहे. आपण नेहमीच चांगल्या मानाने आपलं काम करत राहायला हवं, त्यातूनच काहीतरी चांगलं निष्पन्न होतं, असा संदेश देणारा हा सिनेमा आहे. एक धमाल, निखळ मनोरंजन करणारा सिनेमा आहे. सर्व वयोगटातील प्रेक्षकांना हा सिनेमा जवळचा वाटेल, यात शंका नाही, असेही हेमंत ढोमे सांगतो.
Marathi Movie Satarcha Salman Trailer Out
