वाराणसी (उत्तर प्रदेश) – मागील वर्षी आयोध्येतील राम मंदिराच्या भूमिपूजनानंतर आता पंतप्रधान नरेंद्र मोदी यांच्या हस्ते दि१३ डिसेंबर रोजी काशी विश्वनाथ धाम भाविकांना समर्पित करण्यात येणार आहे. तसेच संध्याकाळी पंतप्रधान मोदी घाटांवर जलविहार करीत येथे साजरा होणारा गंगा उत्सव पाहतील. यावेळी त्यांच्यासमवेत देशातील विविध राज्यांचे १३ मुख्यमंत्री उपस्थित राहणार आहेत.
काशी विश्वनाथ धामच्या उद्घाटनानंतर शहरात देव दीपावलीचे दर्शन होणार आहे. यामध्ये काशीच्या अर्धचंद्राच्या आकाराच्या घाटांवर दिव्यांची सजावट करून काशीभूमीवर देवतांचे स्वागत करण्यात येणार आहे. हे संपूर्ण दृश्य पाहण्यासाठी पंतप्रधान नरेंद्र मोदी १३ डिसेंबरच्या संध्याकाळी खिरकिया घाट ते अस्सी घाटापर्यंत जलविहार करणार आहेत.
एक अद्भुत कार्यक्रम
पंतप्रधानांसोबत अनेक राज्यांचे मुख्यमंत्रीही उपस्थित राहून या अद्भुत कार्यक्रमाचे साक्षीदार होतील. दुसऱ्या दिवशी दि. १४ डिसेंबर रोजी पंतप्रधान नरेंद्र मोदी बनारस रेल फॅक्टरी येथे भाजपशासित राज्यांच्या मुख्यमंत्री आणि उपमुख्यमंत्र्यांच्या सुशासन परिषदेला संबोधित करतील.
प्रसाद घरोघरी पोहोचवणार
काशी विश्वनाथ धाम भक्तांना समर्पित केल्यानंतर भाजप कार्यकर्ते काशी विश्वनाथाचा प्रसाद घरोघरी पोहोचवणार आहेत. त्यासाठी मंदिरातील महादेवाला अर्पण केलेला प्रसाद भाजपच्या केंद्रांना पाठवला जाणार आहे. येथून तो प्रत्येक कामगारावर २५ कुटुंबांना प्रसाद पोहोचवण्याची जबाबदारी देण्यात येणार आहे. या प्रसादामध्ये बेसनाचे दोन लाडू आणि काशी विश्वनाथावर आधारित एक पुस्तिका असेल.
जगाभरातील ३ हजार विशेष पाहुणे
काशी विश्वनाथ धामच्या अलौकिक, ऐतिहासिक आणि अद्भुत सोहळ्याचे पंतप्रधान नरेंद्र मोदी यांच्यासह भारतासह जगातील ३ हजार विशेष पाहूणे साक्षीदार होणार आहेत. त्यासाठी देशातील आणि जगातील विविध संप्रदायातील संत, महंत आणि प्रमुखांची यादी तयार करण्यात येत आहे. सुरक्षेचा विचार करून, विशेष विधी दरम्यान आमंत्रित केलेल्यांनाच मंदिर परिसरात येण्याची परवानगी दिली जाईल.
मोदी मुख्य यजमान
याच दिवशी सकाळी काशी विश्वनाथ धाम येथे महादेवाच्या विशेष विधीसाठी पंतप्रधान नरेंद्र मोदी मुख्य यजमान असतील. यादरम्यान, देशातील विविध पंथांच्या प्रमुखांच्या मंत्रोच्चारात पंतप्रधान देशातील सर्व नद्यांच्या पाण्याने राजराजेश्वराच्या रूपात काशीपुराधिपतीला अभिषेक करतील. यादरम्यान मंदिर परिसरात संत-महंतांशिवाय देशातील विविध क्षेत्रातील मान्यवरांनाही निमंत्रित करण्यात आले आहे. मंदिर प्रवेशासाठी पास किंवा निमंत्रण पत्रिका देण्याची व्यवस्था असेल.
महापौर परिषद
काशी विश्वनाथ धाममध्ये देशभरातील प्रमुख शहरांचे महापौर एकत्र येणार आहेत. काशी विश्वनाथ धामच्या उद्घाटनानंतर, पंतप्रधान नरेंद्र मोदी १७ डिसेंबर रोजी प्रस्तावित महापौर परिषदेला उपस्थित राहणार आहेत. महिनाभर चालणाऱ्या भव्य काशी-दिव्य काशी अभियानांतर्गत या परिषदेत देशभरातील प्रमुख शहरांचे महापौर एकत्र येणार आहेत. याठिकाणी महापौर आपल्या शहरांमध्ये वारसा पुनरुज्जीवनासाठी सुरू असलेल्या कामांची माहितीही पंतप्रधानांसमोर मांडतील.
