इंडिया दर्पण ऑनलाईन डेस्क – चित्रपटसृष्टीत ‘ऑस्कर’ हा अत्यंत मानाचा पुरस्कार मानला जातो. या पुरस्कारासाठी नामांकित होणं हा देखील एक सन्मानच असतो. मराठी चित्रपटसृष्टीतील अनेक चित्रपटांना हा मान मिळाला आहे. यंदा ‘कांतारा’ या कन्नड चित्रपटाने हा मान पटकावला आहे. रिषभ शेट्टी यांचा ‘कांतारा’ हा चित्रपट काही महिन्यांपूर्वीच प्रदर्शित झाला. हा चित्रपट प्रेक्षकांना फारच भावला. परिणामी या चित्रपटाने रेकॉर्डतोड कमाई केली आहे. आता हा चित्रपट ऑस्करच्या शर्यतीत सहभागी झाला आहे.
‘कांतारा’ या चित्रपटासाठी तसेच त्यातल्या अभिनयासाठी रिषभ शेट्टींचं मोठ्या प्रमाणावर कौतुक झालं. नेहमीच्या पठडीपेक्षा वेगळा असा हा चित्रपट असल्याने प्रेक्षकांनी देखील त्याला डोक्यावर घेतलं. या चित्रपटाच्या कथेने प्रेक्षकांना वेगळा विचार करण्यास भाग पडलं. चित्रपटगृहानंतर आता ओटीटीवरही हा चित्रपट लोकप्रिय होतो आहे. मूळ कन्नड भाषेत असलेल्या या चित्रपटाला मिळणारा उत्स्फूर्त प्रतिसाद पाहिल्यानंतर निर्मात्यांनी इतर भाषांमध्ये देखील हा चित्रपट आणला. कन्नडशिवाय इतर भाषांमध्येही या चित्रपटाने जोरदार कमाई केली आहे. सोशल मीडियावरही या चित्रपटाची भलतीच वाहवा झाली.
होम्बले प्रॉडक्शन्सने या चित्रपटाची निर्मिती केली आहे. या संस्थेचे संस्थापक विजय किरांगदुर यांनी सांगितले की, ”‘कांतारा’ या चित्रपटाचं ऑस्करसाठी नॉमिनेशन व्हावं यासाठी आम्ही अर्ज केला आहे. अद्याप यावर निर्णय होणे बाकी आहे. असे असले तरीही हा चित्रपट त्याच्या कथेमुळे आपली वेगळी ओळख निर्माण करू शकतो, याची आम्हाला खात्री असल्याचेही, त्यांनी म्हटले आहे. ‘कांतारा’ हा कन्नड भाषेतील शब्द असून त्याचा अर्थ ‘रहस्यमयी जंगल’ असा होतो. जंगलच्या देवतेला कन्नड भाषेत ‘कांतारे’ म्हटलं जातं. त्यावरून या चित्रपटाचं नाव ‘कांतारा’ असं देण्यात आलं आहे.
Kantara Movie Oscar Nomination Application
Entertainment
