‘जॉन्सन अँड जॉन्सन’ बेबी पावडरचा परवाना अखेर रद्द

मुंबई (इंडिया दर्पण वृत्तसेवा) – जॉन्सन अँड जॉन्सन बेबी पावडर आरोग्यासाठी घातक असल्याच्या बातम्या गेल्या अनेक महिन्यांपासून समोर येत आहेत. या माहितीत तथ्य असल्याचे निदर्शनास आल्याने या कंपनीचा परवाना रद्द करण्यात आला आहे. उत्पादनाच्या पद्धतीत दोष असल्याने अन्न आणि औषध प्रशासनाकडून ही कारवाई करण्यात आली आहे.

मुंबईमधील मुलुंडस्थित जॉन्सन अँड जॉन्सन प्रायव्हेट लिमिटेड कंपनीचा परवाना महाराष्ट्र अन्न आणि औषध प्रशासनाने रद्द केला आहे. पुणे आणि नाशिक येथील या पावडरचे नमुने तपासणीसाठी पाठवण्यात आले होते. त्यामध्ये काही धोकादायक पदार्थ आढळल्याने हा परवाना रद्द करण्यात आला आहे. या पावडरचे पीएच मूल्य अनिवार्य मर्यादेपेक्षा जास्त आढळून आले. याचा नवजात बालकांच्या आरोग्यावर वाईट परिणाम होऊ शकतो म्हणून महाराष्ट्र सरकारने राज्यातील जॉन्सन अँड जॉन्सन बेबी पावडरचा परवाना रद्द केला आहे.

या पावडरच्या वापराने नवजात शिशु आणि लहान मुलांच्या त्वचेला नुकसान होण्याची शक्यता असल्याने बेबी पावडरचे उत्पादन सुरू ठेवणे हे जनहिताच्या दृष्टीने योग्य होणार नाही. त्यामुळे संस्थेच्या मुलुंड येथील जॉन्सन अँड जॉन्सन बेबी पावडर उत्पादन कारखान्याचा परवाना कायमस्वरूपी रद्द करण्यात आला आहे.

या देशात दोन वर्षांपासून बंदी
अमेरिका आणि कॅनडामध्ये जॉन्सन अँड जॉन्सन बेबी पावडरवर दोन वर्षांपासून बंदी आहे. या पावडरमध्ये कॅन्सरला कारणीभूत ठरणारे घटक असल्याचा आरोप करण्यात आला होता. यामुळे कंपनी विरोधात अनेक खटले दाखल करण्यात आले आहेत. अमेरिकेमध्ये जॉन्सन अँड जॉन्सन कंपनी विरोधात ४० हजारहून अधिक खटले दाखल करण्यात आले आहेत. त्यानंतर अमेरिका आणि कॅनडामध्ये जॉन्सन अँड जॉन्सन बेबी पावडरवर बंदी घालण्यात आली. जॉन्सन अँड जॉन्सन बेबी पावडरमध्ये ‘एस्बेस्टस’ नावाचा घटक असल्याचा आरोप असून हा पदार्थ कॅन्सर रोगास कारणीभूत ठरतो. त्यामुळे कंपनीविरोधात अनेक खटले दाखल करण्यात आले होते.

हे महत्त्वाचे
पीएच मूल्य हे पदार्थाच्या आंबटपणा आणि क्षारतेचे मोजमाप आहे. हे pH स्केल किंवा pH बारवर मोजले जाते. जेथे ० अम्लीय आणि १४ अल्कधर्मी दर्शवितो. बाळाची त्वचा प्रौढांच्या त्वचेपेक्षा नाजूक असते. नवजात मुलांच्या त्वचेचा पीएच किंचित जास्त असतो. त्यामुळे ५.५ pH मूल्यापेक्षा जास्त pH मूल्य बाळाच्या संवेदनशील त्वचेला गंभीर नुकसान करू शकते.

Maharashtra Food & Drugs Administration has cancelled the manufacturing license of Johnson’s Baby Powder of Johnson’s & Johnson’s Pvt. Ltd., Mulund, Mumbai after samples of the powder drawn at Pune & Nashik were declared "Not of Standard Quality" by the govt pic.twitter.com/4iFIdNd9RI

— ANI (@ANI) September 16, 2022

Johnson & Johnson’s Baby Powder License Cancels FDA