इंडिया दर्पण ऑनलाईन डेस्क – तीर्थनगरी अशी ओळख असलेल्या हरिद्वार येथून देशातील पहिली पॉड टॅक्सी संचालित होणार आहे. या संदर्भात उत्तराखंड सरकारने महत्त्वाचा निर्णय घेतला आहे. नुकत्याच झालेल्या मंत्रिमंडळाच्या बैठकीतील निर्णयानुसार, या पॉड टॅक्सीचा मार्ग सुमारे २०.७४ किलोमीटरचा असणार आहे.
हरिद्वारला कुंभनगरी असेही म्हणतात. त्यामुळे येथील वाहतुकीची आधुनिक साधने विकसित करण्यासाठी उत्तराखंड मेट्रो कॉर्पोरेशनने येथे पॉड टॅक्सी चालवण्याचा प्रस्ताव तयार केला आहे. हरिद्वारमधील ज्वालापूरच्या टोकापासून भारत माता मंदिर आणि दक्ष प्रजापती मंदिरापासून लक्सर रोडपर्यंत एकूण ४ कॉरिडॉर बनवले जाणार आहेत. या कॉरिडॉरमध्ये २०.७४ किलोमीटर लांबीचा ट्रॅक असेल आणि येथे पॉड टॅक्सी चालवल्या जातील. यासाठी उत्तराखंड मेट्रो कॉर्पोरेशनने सविस्तर प्रकल्प अहवाल तयार केला आहे.
मंत्रिमंडळाची मंजुरी मिळाल्यानंतर यासाठी निविदा मागविण्यात येणार आहेत. या मार्गावरील प्रमुख स्थानकांमध्ये सीतापूर, ज्वालापूर, आर्य नगर, रामनगर, रेल्वे स्टेशन, हरकी पौडी, खडखडी, मोतीचूर, शांतीकुंज, भारत माता मंदिर, गणेशपुरा मंदिर, जगजीतपूर आणि लक्सर यांचा समावेश आहे. हा प्रकल्प दीड वर्षात पूर्ण होणार असल्याचे सांगण्यात येत आहे. या प्रकल्पात भूसंपादनाची फारशी गरज भासणार नाही.
इतर शहरांचाही विचार
भारतातील पॉड टॅक्सीचा हा पहिला वापर असेल. या प्रकल्पाच्या यशावर अनेक गोष्टी अवलंबून असल्याचे उत्तराखंड सरकारचे अधिकारी सांगतात. त्याच वेळी, त्याचे यश देशातील उर्वरित शहरांसाठी एक उत्कृष्ट उदाहरण म्हणून काम करेल आणि नव्या संकल्पना भारतभर रावबण्यास मदत होईल असेही सांगितले जात आहे.
Indias First Pod Taxi Will Run In this City
