नाशिक (इंडिया दर्पण वृत्तसेवा) – नाशिक विभाग शिक्षक मतदार संघ निवडणुकीच्या पहिल्या फेरीचे आकडे समोर आले असून त्यात शिवसेना शिंदे गटाचे उमेदवार आमदार किशोर दराडे यांनी १७७५ मतांनी आघाडी मिळाली आहे.
या पहिल्या फेरीत किशोर दराडे – १११४५ यांना, विवेक कोल्हे – ९३७०, संदीप गुळवे – ७०८८ मते मिळाली आहे. अद्याप मतमोजणीचे अधिकृत आकडे जाहीर केलेले नाही. पाच जिल्ह्यांत एकूण ६४ हजार ८४८ मतदारांनी मतदान केले असून त्याची मोजणी ३० टेबलवर होत आहे. पहिले वैध मते ठरवली गेली. त्यानंतर ५० मतांचे गठ्ठे बांधण्यात आले. त्यानंतर पहिल्या पसंतीच्या मतांची मोजणी झाली.
मतपत्रिका जास्त
नाशिक विभाग शिक्षक मतदारसंघाच्या निवडणुकीची मतमोजणी आज केंद्रीय वखार महामंडळ, गोदाम अंबड येथे सकाळी ८ वाजता सुरु झाली. या मतमोजणीत चोपडा येथील २२ क्रमांकाच्या मतदान केंद्रात ९३५ मतदान झाल्याची नोंद होती. मात्र या ठिकाणी मतपेटीत ९३८ मतपत्रिका आढळून आल्या. नाशिक जिल्ह्यातील येवला व निफाड मतदान केंद्राच्या मतपेटीत एक – एक मतपत्रिका जास्त आढळून आली. यावर ठाकरे गटाने आक्षेप घेतला. या पाच मतपत्रिका तूर्त बाजूला ठेवण्यात आल्या आहे. जास्त मतपत्रिका आढळल्यामुळे काही काळ गोंधळ होता.