देशातील सातव्या टप्प्यासाठी ९०४ उमेदवार निवडणुकीच्या रिंगणात…या ५७ ठिकाणी होणार निवडणुका

नवी दिल्‍ली (इंडिया दर्पण वृत्तसेवा) – 1 जून 2024 रोजी मतदान होणाऱ्या, 8 राज्ये/केंद्रशासित प्रदेशातील,सातव्या टप्प्यातील लोकसभा 2024 निवडणुकीसाठी एकूण 904 उमेदवार निवडणुकीच्या रिंगणात आहेत. 8 राज्ये/केंद्रशासित प्रदेशातील लोकसभा निवडणूक 2024 मधील 57 लोकसभा मतदारसंघांसाठी एकूण 2105 उमेदवारी अर्ज दाखल करण्यात आले आहेत. या सर्व 8 राज्ये/केंद्रशासित प्रदेशांमध्ये सातव्या टप्प्यासाठी उमेदवारी अर्ज दाखल करण्याची अंतिम तारीख 14 मे 2024 होती. दाखल केलेल्या सर्व उमेदवारी अर्जांची छाननी केल्यानंतर, 954 उमेदवारी अर्ज वैध असल्याचे आढळले.

सातव्या टप्प्यात, पंजाबमध्ये 13 लोकसभा मतदारसंघातून सर्वाधिक 598 उमेदवारी अर्ज आले होते, त्याखालोखाल उत्तर प्रदेशमध्ये 13 लोकसभा मतदारसंघातून 495 उमेदवारी अर्ज आले होते. बिहारमधील 36 -जेहानाबाद लोकसभा मतदारसंघात सर्वाधिक 73 उमेदवारी अर्ज प्राप्त झाले, त्याखालोखाल पंजाबमधील 7-लुधियाना लोकसभा मतदारसंघात 70 उमेदवारी अर्ज दाखल झाले. सातव्या टप्प्यासाठी लोकसभा मतदारसंघांमध्ये प्रतिस्पर्धी उमेदवारांची सरासरी संख्या 16 आहे.