वंदना वेदपाठक, इंडिया दर्पण वृत्तेसवा
भूमी पेडणेकरच्या ‘भक्षक’चा ट्रेलर नुकताच रिलीज झालाय. काही दिवसांपूर्वी या चित्रपटाचा टीझर रिलीज झाला होता, आणि तो प्रेक्षकांच्या खूप पसंतीस उतरला होता. आता ट्रेलर रिलीज झाल्यानंतर प्रेक्षकांना खूप उत्सुकता लागून राहिली आहे. शाहरुख खानच्या प्रॉडक्शन हाऊसच्या ‘भक्षक’ सिनेमात भूमी पेडणेकर निडर पत्रकाराची भूमिका साकारत आहे.
अभिनेत्री भूमी पेडणेकरचा नवा चित्रपट ‘भक्षक’ थेट OTT वर प्रदर्शित होणार आहे. ‘भक्षक’ हा सिनेमा २०१८ साली समोर आलेल्या बिहारच्या मुझफ्फरपूर शेल्टर होम बलात्कार प्रकरणावर आधारित आहे. ‘भक्षक’ सिनेमात दाखवलेल्या घटना ही केवळ बिहारच्या मुझफ्फरपूर शेल्टर होम बलात्कार प्रकरणाची घटना नाही तर देशात अशा घटना घडतच असतात, असं चित्रपटाचे दिग्दर्शक पुलकित यांचे मत आहे.
शाहरुख खानच्या प्रोडक्शन रेड चिलीज अंतर्गत गौरी खान आणि गौरव वर्मा यांनी ‘भक्षक’ चित्रपटाची निर्मिती केली आहे. या चित्रपटात भूमी पेडणेकर आणि संजय मिश्राशिवाय आदित्य श्रीवास्तव आणि सई ताम्हणकर मुख्य भूमिकेत आहेत. चित्रपटाचे दिग्दर्शक पुलकित सांगतात, ‘भक्षक’ चित्रपटाच्या माध्यमातून समाजातील कटू वास्तव दाखविण्याचा आमचा उद्देश आहे.” हा चित्रपट ९ फेब्रुवारी २०२४ रोजी OTT प्लॅटफॉर्म Netflix वर प्रदर्शित होणार आहे.
