त्र्यंबकेश्वर (इंडिया दर्पण वृत्तसेवा) – श्री गणराया पाठोपाठ घराघरात आज जेष्ठा, कनिष्ठा गौरींच आगमन झाल्याने सर्वत्र आनंदाच वातावरण निर्माण झाले आहे. सोनपावलांनी आलेल्या गौरींच्या स्वागतासाठी घरोघर कामांची लगबग सुरु होती. घरातील पुरुष मंडळींनी सजावटीसाठी बरीच मेहनत घेतली. गणराया पाठोपाठ गौरींचं आगमन झाल्याने घरोघर चैतन्याचं वातावरण पसरले होते. त्र्यंबकेश्वर मध्ये तिनशे पेक्षा अधिक घरांमध्ये गौरींचे आगमन झाले आहे. प्रत्येक ठिकाणी गौरींसाठी उत्कृष्ठ सजावट करण्यात आलेली होती. माहेरी आलेल्या गौरींच्या नैवेद्यासाठी विविध पदार्थ तयार करण्यासाठी महिलावर्गाची धावपळ सुरु आहे. घराघरात खमंग वास दरवळत आहे. घरांसमोर विविधरंगी रांगोळ्या व गौरींचे सोनपावलं लक्ष वेधुन घेत आहे. गौरी गणपतीच्या आगमनाने घरातील बच्चे कंपनीमध्ये उत्साह संचारला होता.
पांडव नगरी, नाशिक मधील नंदकुमार धारणे यांच्या त्र्यंबकराज निवासस्थानी गौरींचं पारंपारीक रित्या मोठ्या थाटात आगमन झाले. वसुधा, निलीमा, राधिका, आकांक्षा आदी सुवाशिनींनी मोठ्या भक्तीभावाने गौरींचे स्वागत व स्थापना केली. अभिजित, आशिष, आदित्य यांनी उत्कृष्ठ सजावट केली. परी, काव्या, आद्य, श्रावी, या बालगोपाळांनी सर्व कामांमध्ये उत्साहाने सहभाग नोंदवला. त्र्यंबकेश्वर येथील वेदमुर्ती महेंद्र तथा बाळासाहेब धारणे यांच्या नाथकृपा निवासस्थानी गौरींची मोठ्या उत्साहात स्थापना करण्यात आली. स्वाती, मयुरी, निखिल, हर्षदा तसेच हिरण्या यांनी मोठ्या उत्साहात गौरीचे स्वागत केले.
नाशिक इंदिरानगर परिसरात सत्यसंगम सोसायटीमध्ये सुपर प्रिटींग प्रेसचे संचालक उज्वला विनायक रत्नपारखी यांच्या निवासस्थानी गौरींची उत्कृष्ठ सजावट करण्यात आली आहे. नाशिक, खुटवडनगर, २०२, श्रीव्यंकटेश प्राईड मध्ये वैभव व विनोद देशपांडे यांच्या निवासस्थानी त्र्यंबकेश्वर येथील कुशावर्त तिर्थाचा देखावा तयार करुन गौरींची सजावट करण्यात आली आहे. याकामी दिपाली, उर्मिला, आर्या, वरद, श्रावणी आदिंनी परिश्रम घेतले. काल गौरींचं आगमन झाल्यावर आज पुजन तर उद्या म्हणजे सोमवारी मुळ नक्षत्रावर गौरींचं विसर्जन होईल.