होळीनंतर बाथरुममध्ये आंघोळ करत असताना दाम्पत्याचा मृत्यू; गॅस गिझरने केला घात

इंडिया दर्पण ऑनलाईन डेस्क – घराघरात सर्रासपणे गॅस गिझरचा वापर होत आहे. मात्र, हेच गॅस गिझर अनेकदा धोकादायक ठरत आहे. असाच प्रकार गाझियाबादच्या मुरादनगरमध्ये घडला आहे. येथील अग्रसेन विहार कॉलनीत उद्योजक दीपक गोयल (४०) आणि त्यांची पत्नी शिल्पी (३६) यांचा बाथरूममध्ये गुदमरून मृत्यू झाला. होळी खेळल्यानंतर दोघेही घराच्या पहिल्या मजल्यावरील बाथरूममध्ये गॅस गिझर लावून आंघोळ करत होते. गॅस गिझरमधून विषारी कार्बन मोनॉक्साईड वायू तयार होऊन गुदमरल्याने मृत्यू झाल्याची शक्यता पोलिसांनी व्यक्त केली आहे. बाथरूममध्ये वायुवीजन नव्हते. दोघांनाही जीव वाचवण्यासाठी ओरडण्याचीही संधी मिळाली नाही.

कुटुंबीयांसह होळी खेळल्यानंतर दोघे दुपारी तीन वाजता आंघोळीसाठी बाथरूममध्ये गेले. साडेचारपर्यंत तो बाहेर न आल्याने मुले चिंतेत होती. त्यांनी बाथरुमजवळ जाऊन आई-वडिलांना हाक मारली पण प्रतिसाद मिळाला नाही. त्यामुळे अनुचित प्रकार घडण्याची भीती सतावू लागली. बाथरुमचा दरवाजा हाताने वाजवूनही तिथून आवाज न आल्याने मुले शेजाऱ्यांपर्यंत पोहोचली. तसेच काका नितीनला फोन करून मुलांनी बोलावले.

नितीन म्हणाला की, तो आणि शेजारी घरी पोहोचले. बाथरुमचा दरवाजा न उघडल्याने त्यांनी खिडकीची काच फोडून आत प्रवेश केला. भाऊ आणि वहिनी बेशुद्ध पडलेले होते. दोघांच्या चेहऱ्यावर पाणी टाकल्यानंतरही त्यांच्या शरीरात कोणतीही हालचाल होताना दिसली नाही. अखेर त्यांना गाझियाबादमधील डॉक्टरांकडे नेण्यात आले. मात्र, दोघांचा मृत्यू झाल्याचे डॉक्टरांनी सांगितले.

पोलिसांनी सांगितले की, सुरुवातीला गॅस गिझरमुळे बाथरूममध्ये ऑक्सिजनची कमतरता असल्याचे दिसते. यातून विषारी वायू तयार झाला. या वायूमुळे दोघे गुदमरले. वायुवीजनासाठी खिडकी नव्हती. एक छोटी खिडकी होती पण ती बंद होती. शवविच्छेदन अहवालात मृत्यूचे कारण स्पष्ट झालेले नाही. व्हिसेरा फॉरेन्सिक सायन्स प्रयोगशाळेत तपासणीसाठी पाठवला जाईल, असे पोलिसांनी स्पष्ट केले.

दरम्यान, या दाम्पत्याची मुलगी भावी (13) आणि मुलगा शौर्य (11) रडत आहेत. त्यांची प्रकृती बिघडली आहे. रुग्णालयातून दाम्पत्याचे मृतदेह घरी आल्यावर आई-वडिलांचे काय झाले, असाच प्रश्न दोघांकडूनही विचारला जात होता. काही वेळापूर्वीपर्यंत सर्व काही ठीक होते. दीपक गोयल यांची आई मिथलेश आपल्या मुलाचे आणि सुनेचे मृतदेह पाहून बेशुद्ध पडल्या होत्या. पाऊण तासापूर्वी सर्वांसोबत होळी खेळणारी व्यक्ती आता आपल्यात नाही यावर कुटुंबीयांना विश्वास बसणे कठीण जात होते. दीपक गोयल यांनी काही दिवसांपूर्वी गाझियाबादमध्ये रासायनिक कारखाना उघडला होता.

Gas Geyser Couple Death in Bathroom while Bathing