विजय वाघमारे, जळगाव
जळगाव – दूध संघातील सुमारे चार लाख रुपयांच्या तुपाचा अपहारप्रकरणी दाखल असलेल्या गुन्ह्यात कार्यकारी संचालक मनोज लिमये यांच्यासह यांच्यासह हरी रामू पाटील, किशोर काशिनाथ पाटील आणि अनिल हरिशंकर अग्रवाल यांना शहर पोलिसांनी सोमवारी रात्री ११ वाजता अटक केली. या प्रकरणात आणखी काही जणांना अटक शक्यता आहे. दरम्यान, सध्या दूध संघाची निवडणूक प्रक्रिया सुरू असून, त्याआधीच अटकसत्र सुरू झाल्यामुळे खळबळ उडाली आहे. या अटकसत्रामुळे खडसे गटाला मोठा धक्का बसला आहे.
काय आहे नेमकं प्रकरण
जिल्हा दूध संघातून तुपाची परस्पर विक्री करून अपहार केल्याचा सर्वात पहिला गुन्हा सप्टेंबर महिन्यात दाखल करण्यात आला. यानंतर लिमये यांनी लोणी चोरी झाल्याबाबत तक्रार दिली होती. यानंतर आणखी दोन तक्रारी आल्या होत्या. यातील जबाबानुसार दूध संघात एकूण १ कोटी १५ लाख रुपयांचा अपहार करून शासनाची फसवणूक केल्याप्रकरणी शहर पोलिस ठाण्यात दोन जणांविरोधात गुन्हा दाखल करण्यात आला आहे. तर तूप चोरी प्रकरणात डेप्युटी एमडी शैलेश मोरखडे यांनी दिलेल्या फिर्यादीवरून गुन्हा दाखल करण्यात आला आहे. या गुन्ह्यात सोमवारी मनोज लिमये यांना अटक केली. गुन्ह्यातील मूळ फिर्यादीत संस्थेचे कार्यकारी संचालक, अध्यक्षा तसेच काही संचालक व मोजक्या कर्मचाऱ्यांनी अपहार केल्याचे नमूद केले आहे.
एमडी लिमये यांच्यावर अपहार केल्याचा संशय
या प्रकरणात सुरुवातीला लिमये यांनी दूध संघात चोरी झाल्याची तक्रार केली होती. नंतर पोलिसांनी चौकशी करून गुन्हा दाखल केला. दरम्यान, दुसऱ्या एका तक्रारीत एमडी लिमये यांच्यावरही अपहार केल्याचा संशय होता. त्यानुसार डेप्युटी एमडी शैलेश मोरखडे यांची फिर्याद घेण्यात आली. त्यानंतर लिमये यांना अटक करण्यात आली आहे. तसेच शहरातील विठ्ठल रुख्मिणी एजन्सीचे मालक किशोर काशिनाथ पाटील व चालक हरी रामू पाटील यांनाही अटक केली.