दिंडोरी : दिंडोरी तालुक्यात दोन दिवसांपासुन सुरु झालेल्या पावसामुळे फुलोरा अवस्थेत असलेल्या द्राक्ष बागांची गळकुज झाली असुन द्राक्ष उत्पादकांचे मोठे नुकसान झाले आहे.तसेच शिंदवड व इंदोरे येथे १९ मेंढ्या पाऊस व थंडीने मरण पावल्या आहे. अनेक वर्षांपासून शिंदवड येथे राहणारे मेंढपाळ ताराचंद कचरु ढेपले यांच्याकडे ११० मेंढ्या असुन त्यातील १० मेंढ्या पाऊस व थंडीने गारठुन जागीच ठार झाल्याची घटना घडली आहे. तलाठी कांडेकर ,डॉ चौधरी,यांनी पंचनामा केला असुन शिंदवड ग्रामपंचायत सदस्य सोपान बस्ते,अमोल बरकले,व सुनिल बस्ते,आदी उपस्थित होते. तसेच इंदोरे येथे चारा पाण्यासाठी आलेल्या मेंढपाळ यांच्या नऊ मेंढ्या थंडी व पावसाने मरण पावल्या.तलाठी ग्रामसेवक व पशू वैद्यकीय अधिकाऱ्यांनी पंचनामा केला तालुका काँग्रेस कार्याध्यक्ष वाळू जगताप उपस्थित होते.
द्राक्ष पिकाचे मोठे नुकसान
या पुर्वी कोरोनामुळे संकटात सापडलेल्या बळीराजाला पुन्हा एकदा अवकाळीने फटका दिल्याने शेतकरी हतबल झाले आहे.गळकुज झालेल्या द्राक्ष बागांचे व काढणीला आलेला कांदा आदी पिकांचे नुकसान झाले असुन पंचनामे करण्याची मागणी केली जात आहे. दुपारी थोडी पावसाची उघडीप मिळताच शेतकरी महागडे औषधे फवारणी करत पीक वाचविण्याचा प्रयत्न करत होते.
भरीव मदत करावी
माझ्या १० मेंढ्या अवकाळी पाऊस व थंडीने गारठुन मेल्यामुळे माझे मोठे आर्थिक नुकसान झाले आहे तरी मला शासनाने भरीव मदत करावी
ताराचंद ढेपले, मेंढपाळ
