सातारा (इंडिया दर्पण वृत्तसेवा) – प्रसिद्ध लावणी नृत्यांगना गौतमी पाटील पुन्हा एकदा चर्चेत आली आहे. यावेळी ती तिच्या नृत्यातील अश्लील हावभावांमुळे नव्हे तर तिला डान्स करण्यासाठी पाठविण्यात आलेल्या निमंत्रणाने धुमाकूळ घातला आहे. सातारा जिल्ह्यातील एका बैलमालकाने त्याच्याकडील बैलाच्या वाढदिवसानिमित्त गौतमीला डान्ससाठी बोलाविले आहे. मुख्य म्हणजे सदैव प्रकाशझोतात राहणाऱ्या गौतमीनेही हे आगळेवेगळे निमंत्रण स्वीकारत बिनधास्त्र नृत्य सादर केले आहे.
बैलाच्या वाढदिवसानिमित्त गौतमी पाटीलच्या नृत्याचा कार्यक्रम आयोजित करणाऱ्या बैलमालकाचे नाव सतीश भोसले आहे. भोसले हे प्रसिद्ध पैलवान आहेत. त्यांच्याकडे अश्विन नावाचा बैल आहे. हा बैलदेखील साधासुधा नाही. त्याने महाराष्ट्र चॅम्पियन हा किताब पटकाविलेला आहे. अशा या खास बैलाच्या वाढदिवसानिमित्त हा डान्स सोहळा आयोजित करण्यात आला. गौतमीनेही नेहमीप्रमाणे स्वत:च्या नृत्याविष्काराने उपस्थितांना घायाळ केले. तिच्या या कार्यक्रमाला प्रचंड गर्दी असल्याची माहिती आहे.
कायमच वादग्रस्त
गौतमी पाटील ही तिच्या नृत्यशैलीमुळे कायमच वादग्रस्त राहीली आहे. तिच्यावर यापूर्वी अनेकांनी टीका केली आहे. तसेच गौतमीनेदेखील बरेचदा माफी मागून स्वत:चा बचाव केला आहे. मात्र, त्यानंतरही तिला येणाऱ्या कार्यक्रमाच्या ऑफर्स कमी झालेल्या नाहीत. उलट तिच्या कार्यक्रमांना मागणी वाढली आहे. सतत होणारे वाद, अनोखी नृत्यशैली यामुळे तिला लवकर प्रसिद्धी मिळाली आहे. काही दिवसांपूर्वी गौतमी पाटीलचा कपडे बदलतानाचा व्हिडिओ व्हायरल झाला होता. या बाबीची दखल राज्य महिला आयोगानेही घेतली होती.
Dancer Gautami Patil Program for Bull Birthday Event
