पुणे (इंडिया दर्पण वृत्तसेवा) – गेल्या काही दिवसात अपहरणाच्या अनेक घटना समोर येत आहेत. पुण्यातील येवलेवाडी येथील एका शाळेतील तीन शाळकरी मुलींचे अपहरण करण्याचा प्रयत्न झाला आहे. कोंढवा परिसरातील येवलेवाडी गावात सकाळी सात वाजेच्या सुमारास ही घटना घडली. या मुलींच्या हुशारीमुळे एकीचेही अपहरण झाले नसून तिन्ही मुली सुखरुप आहेत. याबाबत मुलींनी शाळेत आणि घरी सांगितल्यानंतर मुख्याध्यापकांनी पोलिसात तक्रार केली आहे.
पोलिसांनी दिलेल्या माहितीनुसार, शुक्रवारी सकाळी सात वाजेच्या सुमारास येवलेवाडी परिसरातील एका शाळेमध्ये जाण्यासाठी शाळेची विद्यार्थिनी घरातून पायी निघाली होती. काही अंतर चालल्यावर रस्त्याच्या कडेला एका व्हॅनजवळील व्यक्तीने तिला आडवले आणि तुझी आई आजारी असून दवाखान्यात नेले आहे तुला तिकडेच नेण्यासाठी आम्हाला पाठवले आहे, असे मुलीला सांगितले. मात्र मुलीने सांगितले आत्ताच आईने मला शाळेत पाठवले आहे. त्यामुळे मी तुमच्यासोबत येणार नाही आणि मुलीने तेथून काढता पाय घेत पळत जवळ असलेली शाळा गाठली. त्या मुलीच्या पाठोपाठ येणाऱ्या आणखी दोन मुलींनाही हाच अनुभव आला. त्यातील एका मुलीला तर गाडीत बस म्हणून त्यांनी दमदाटीही केली असल्याचे तक्रारीत म्हटले आहे. मात्र मुलींनी पळ काढून शाळा गाठली. ही घटना मुलींनी शिक्षक आणि मुख्याध्यापकांना सांगितली त्यानंतर शिक्षकांनी शाळेच्या रस्त्यावर व परिसरात व्हॅनचा शोध घेण्याचा प्रयत्न केला मात्र व्हॅन दिसली नाही. त्यानंतर मुख्याध्यापकांनी ही बाब पोलिसामध्ये तक्रार दाखल केली.
अपहरण केल्याची अफवा
कोंढवामध्ये हे प्रकरण घडत असताना याच परिसरात असलेल्या लुल्ला नगर परिसरातील आणखी एका शाळेतील दोन मुलींची अपहरण घडले असल्याची बातमी आज कोंढवा परिसरात वाऱ्यासारखी पसरत होती. याबाबत पोलिस उपायुक्त नम्रता पाटील यांना विचारल्यावर त्या म्हणाल्या की “संबधित शाळेत जाऊन आम्ही मुख्याध्यापकांना भेटलो. त्यांनी सर्व मुलींची मोजणी करून आम्हाला दाखवली. शिवाय एकाही पालकांकडून मुलगी बेपत्ता झाल्याची तक्रार नोंदवण्यात आलेली नाही. त्यामुळे या परिसरात मुले पळविणारी टोळी दाखल झाल्याच्या बातम्या केवळ अफवा आहेत.
जुना व्हिडिओ
मुलांची विक्री केली गेल्याचे व्हिडीओ हा सुद्धा महाराष्ट्राच्या बाहेरचा जुना व्हिडीओ आहे व त्यामध्ये बरेच एडिटींग केले आहे. त्यामुळे नागरिकांनी अशा अफवांवर विश्वास ठेवू नये आणि असे व्हिडीओ दुसऱ्यांना पाठवू नये”, असे आवाहन पोलिस उपायुक्त नम्रता पाटील यांनी केले आहे.
Crime Three Children’s Kidnapping Attempt Police
Pune Yevalewadi
ताज्या आणि महत्त्वाच्या बातम्या WhatsApp वर हव्यात?
तर मग इंडिया दर्पणच्या दर्जेदार, विश्वासार्ह आणि गतिमान वृत्तसेवेचा लाभ घेण्यासाठी खालील ग्रुप जॉइन करा
https://chat.whatsapp.com/