एकाच कुटुंबातील सहा जण आढळले मृतावस्थेत; घातपाताचा संशय

इंडिया दर्पण ऑनलाईन डेस्क – एकाच कुटुंबातील सहा जण मृतावस्थेत आढळल्याने राजस्थानमधील गोल गेदी गावात शोककळा पसरली आहे. घरातील एका खोलीतून चार निष्पापांसह दाम्पत्याचे मृतदेह सापडले आहेत. घटनेची माहिती मिळताच ग्रामस्थांनी घटनास्थळी एकच गर्दी केली आहे. या घटनेत घातपाताचा संशय व्यक्त केला जात आहे.

उदयपूर जिल्ह्यातील ही घटना आहे. झरोली जवळच गोल नेदी हे गाव आहे. गावकऱ्यांनी पोलिसांना यासंदर्भात माहिती दिली. त्यानंतर पोलिसांनी घटनास्थळ गाठून मृतदेह ताब्यात घेऊन पोस्टमॉर्टमसाठी पाठवले. मृत्यूची कारणे अद्याप उघड झालेली नाहीत. मीडिया रिपोर्ट्सनुसार, गोगुंडा पोलिसांनी सांगितले की, सोमवारी सकाळी माहिती मिळताच पोलिसांचे पथक घटनास्थळी पोहोचले. घराचा दरवाजा उघडल्याने पोलिसही अवाक् झाले. घरात तब्बल ६ मृतदेह आढळून आले. सर्व मृतदेह शासकीय रुग्णालयाच्या शवागारात ठेवले आहेत. पोलिसांनी घर सील केले आहे. घटनास्थळी फॉरेन्सिक टीम आणि श्वान पथकालाही पाचारण करण्यात आले आहे. सध्या या कुटुंबाची ओळख पोलिसांनी उघड केलेली नाही. या घटनेची माहिती मिळताच पोलीस अधिकारीही घटनास्थळी दाखल झाले आहेत. पोलिसांनी आत्महत्या आणि खुनाच्या दोन्ही बाजूंचा तपास सुरू केला आहे. सहा जणांचा मृत्यू झाल्याने गावात शोककळा पसरली आहे.

Crime one family Person Dead Body in Home
Rajasthan Udaipur