नाशिक – शहरात घरफोडीची मालिका सुरूच; पाच घरफोड्यांमध्ये सव्वा पाच लाखाच्या ऐवजावर चोरट्यांचा डल्ला
नाशिक : शहरात घरफोडीची मालिका सुरू असून नुकत्याच उघडकीस आलेल्या पाच घरफोड्यांमध्ये तब्बल सव्वा पाच लाख रूपये किमतीचा ऐवजावर चोरट्यांनी डल्ला मारला. याप्रकरणी आडगाव,सातपूर,इंदिरानगर आणि नाशिकरोड पोलीस ठाण्यामध्ये घरफोडीचे गुन्हे दाखल करण्यात आले आहेत. नांदूरगावातील मिलींद दत्तात्रेय हिरगुडे (रा.मधुगिरी कॉलनी,मराठानगर) हे सोमवारी (दि.१५) सायंकाळच्या सुमारास कामानिमित्त कुटूंबियांसह घराबाहेर पडले असता अज्ञात चोरट्यांनी भरदिवसा त्यांच्या बंद घराचे कुलूप तोडून कपाटातील ५० हजाराची रोकड चोरून नेली. दुसरी घटना आडगाव शिवारातील फायर ब्रिगेड निवासस्थान भागात घडली. याप्रकरणी आकाश मोतीराम कांबळे (रा.बिल्डींग नं.३, फायर ब्रिगेड निवासस्थान) यांनी तक्रार दाखल केली आहे. सोमवारी (दि.१५) रात्री अज्ञात चोरट्यांनी कांबळे यांच्या इमारतीत राहणा-या व बाहेरगावी गेलेल्या प्रताप चव्हाण यांच्या घराचे कुलूप तोडून घरफोडी केली. यानंतर चोरट्यांनी पार्किंगमध्ये लावलेली कांबळे यांची सुमारे ५० हजार रूपये किमतीची एमएच १५ जीएस ८५५० ही दुचाकी पळवून नेली. दोन्ही घटनांप्रकरणी आडगाव पोलीस ठाण्यात वेगवेगळे गुन्हे दाखल करण्यात आले असून अधिक तपास अनुक्रमे सहाय्यक निरीक्षक शिंदे व तोडकर करीत आहेत. तिसरी घटना शिंदे पळसे येथे घडली. भास्कर नथु कातकाडे (रा.साई विश्व अपा.जाधव संकुल पळसे) यांनी याप्रकरणी तक्रार दाखल केली आहे. कातकाडे कुटूंबिय दि.१२ ते १५ नोव्हेंबर दरम्यान बाहेर गावी गेले असता ही घटना घडली. अज्ञात चोरट्यांनी त्यांच्या बंद घराचा कडीकोयंडा तोडून बेडरूममधील कपाटातील रोकड व सोने चांदीचे दागिणे असा सुमारे २ लाख १५ हजार ५०० रूपयांचा ऐवज चोरून नेला. याप्रकरणी नाशिकरोड पोलीस ठाण्यात गुन्हा दाखल करण्यात आला असून अधिक तपास सहाय्यक निरीक्षक परदेशी करीत आहेत. चौथी घटना औद्योगीक वसाहतीतील अशोकनगर भागात घडली. किरणकुमार संपतराव साळवे (रा.जाधव संकुल,अशोकनगर) यांनी तक्रार दाखल केली आहे. साळवे कुटूंबिय दि.११ ते १३ नोव्हेंबर दरम्यान बाहेरगावी गेले असता अज्ञात चोरट्यांनी त्यांच्या बंद घराचा कडीकोयंडा तोडून बेडरूममधील कपाटातील सोन्याचांदीचे दागिणे तसेच हॉलमधील टिव्ही आणि शिलाई मशीन असा सुमारे ६६ हजाराचा ऐवज चोरून नेला. याप्रकरणी सातपूर पोलीस ठाण्यात गुन्हा दाखल करण्यात आला असून अधिक तपास उपनिरीक्षक वाघ करीत आहेत. तर पाथर्डी फाटा भागात झालेल्या घरफोडीत चोरट्यांनी १ लाख ३५ हजाराच्या रोकडवर चोरट्यांनी डल्ला मारला. याप्रकरणी किरण कैलास पुरकर (रा.आयकर कॉलनी,घनश्यामनगर) यांनी तक्रार दाखल केली आहे. पुरकर कुटूबिंय सोमवारी (दि.१५) बाहेरगावी गेले असता अज्ञात चोरट्यांनी त्यांच्या बंद घराचा कडीकोयंडा तोडून कपाटातील १ लाख ३५ हजाराची रोकड चोरून नेली. याप्रकरणी इंदिरानगर पोलीस ठाण्यात गुन्हा दाखल करण्यात आला असून अधिक तपास सहाय्यक निरीक्षक सय्यद करीत आहेत.
महिलेच्या गळयातील मंगळसूत्र लांबविले
नाशिक : शतपावलीसाठी घराबाहेर पडलेल्या महिलेच्या गळयातील मंगळसूत्र दुचाकीस्वार भामट्यांनी ओरबाडून नेल्याची घटना अशोकामार्ग भागात घडली. याप्रकरणी मुंबईनाका पोलीस ठाण्यात जबरीचोरीचा गुन्हा दाखल करण्यात आला आहे.
सरला प्रमोद पवार (रा.हरिसंकुल फेज ०२,नारायणनगर शेजारी) यांनी याप्रकरणी तक्रार दाखल केली आहे. सरला पवार या सोमवारी (दि.१५) रात्री नेहमीप्रमाणे शतपावलीसाठी घराबाहेर पडल्या असता ही घटना घडली. अशोकामार्गावरील फोर्टीन एक्स जिम समोरून त्या पायी जात असतांना अचानक बोळीतून आलेल्या दुचाकीस्वाराने त्यांच्या गळयातील सुमारे ३२ हजार रूपये किमतीचे मंगळसूत्र ओरबाडून पोबारा केला. अधिक तपास सहाय्यक निरीक्षक रोंदळे करीत आहेत.
