दुकानदार महिलेचा विनयभंग
नाशिक : पार्किंगच्या वादातून एकाने दुकानदार महिलेस बलात्कार करण्याची धमकी देत विनयभंग केल्याची घटना पाथर्डीगावात घडली. या घटनेत संशयीताने महिलेच्या गाडीचे व मोबाईलचे नुकसान करीत तिच्या बहिणीसही मारहाण केली असून याप्रकरणी इंदिरानगर पोलीस ठाण्यात गुन्हा दाखल करण्यात आला आहे. वाल्मिक गव्हाणे (२८ रा.गौळाणेरोड) असे संशयीताचे नाव आहे. पोलीसांनी दिलेल्या माहितीनुसार पीडितेचे दुकान असून सोमवारी (दि.५) सायंकाळच्या सुमारास पार्किंगच्या वादातून दुकानासमोर ही घटना घडली. संशयीताने महिलेस शिवीगाळ करीत तसेच बलात्कार करण्याची धमकी देत तिचा विनयभंग केला. यावेळी पीडितेची मावस बहिण तिच्या मदतीला धावून आली असता संशयीताने तिलाही मारहाण केली. यावेळी त्याने दुकानासमोर पार्क केलेल्या वाहनाचे आणि मोबाईलचे नुकसान केल्याचे तक्रारीत म्हटले आहे.अधिक तपास उपनिरीक्षक शेख करीत आहेत.
….
जाब विचारल्याने एकास मारहाण
नाशिक : मुलीकडे मोबाईल नंबर का मागितला याबाबत जाब विचारल्याने त्रिकुटाने मुलीच्या वडिलांना बेदम मारहाण केल्याची घटना चुंचाळे शिवारातील माऊली चौकात घडली. याघटनेत लोखडी पाईपाचा वापर करण्यात आल्याने वडिल जखमी झाले असून, याप्रकरणी अंबड पोलीस ठाण्यात गुन्हा दाखल करण्यात आला आहे. प्रकाश रंगनाथ जाधव व त्याचे तिन साथीदार (रा.माऊली चौक,चुंचाळे) अशी संशयीताची नावे आहेत. पोलीसांनी दिलेल्या माहितीनुसार मुलीच्या वडिलांनी याप्रकरणी तक्रार दाखल केली आहे. जखमी व संशयीत एकाच भागात राहणारे आहेत. गेल्या काही दिवसांपासून संशयीत रस्ता अडवून मुलीकडे मोबाईल नंबरची मागणी करीत होते. ही बाब तिने आपल्या कुटूंबियांकडे सांगितल्याने वडिलांनी दि.२९ जून रोजी सायंकाळी संशयीतांना जाब विचारला असता ही घटना घडली. मुली कडे मोबाईल नंबर का मागता अशी विचारणा करताच संशयीतांनी शिवीगाळ करीत त्यांना लाथाबुक्यांनी आणि लोखंडी पाईपाने मारहाण केली. या घटनेत मुलीचे वडिल जखमी झाले असून अधिक तपास सहाय्यक निरीक्षक शेळके करीत आहेत.
