इंडिया दर्पण ऑनलाईन डेस्क – बॉलिवूडमध्ये सतत स्टारकिड्सवर टीका होत असते. कारण, अनेकदा कोणतंही कौशल्य किंवा कला नसताना केवळ आपल्या आई – वडिलांच्या पुण्याईवर बॉलीवूडमध्ये दाखल होतात. हे काहीही असलं, तरी स्टारकिड्सच्या मुलांना वेगळं अटेन्शन मिळतं, हे मात्र नक्की. काही महिन्यांपूर्वीच शाहरुख खानचा मुलगा आर्यन खानच्या अटकेचे प्रकरण चांगलंच गाजलं होतं. ड्रग्स प्रकरणात अडकल्याने त्याच्यावर टीका झाली होती. आर्यन खानला या प्रकरणार क्लीन चीटही मिळाली पण अजूनही त्याच्याबद्दल चर्चा सुरूच आहे.
आता या वादग्रस्त प्रकरणानंतर आर्यन खान बॉलिवूडमध्ये पदार्पण करणार याची चर्चा नव्याने सुरू झाली आहे. तशी तर ही चर्चा बरीच वर्षे सुरू आहे. इतर स्टारकिड्सप्रमाणे शाहरुख आर्यनलाही बिग बजेट चित्रपटातून पुढे आणणार असल्याच्या चर्चा आहेत. शाहरुखची मुलगी सुहाना ही झोया अख्तरच्या वेबसीरिजमधून पदार्पण करणार आहे. मात्र, अजूनही आर्यन खानच्या बॉलिवूड डेब्यूबद्दल कुठेच चर्चा नाही. आता अभिनेता म्हणून बॉलिवूडमध्ये येण्याच्या चर्चा थांबल्या असून आर्यन आता लेखक म्हणून बॉलिवूडमध्ये पदार्पण करणार असल्याची चर्चा रंगताना दिसत आहे.
‘पिंकव्हीला’ या वृत्तसंस्थेने दिलेल्या माहितीनुसार, रेड चिलीजच्या एका प्रोजेक्टमध्ये आर्यन लेखक म्हणून काम करणार आहे. त्यासाठी तो प्रशिक्षणही घेत आहे. यासाठी बरीच दिग्गज मंडळी आर्यनला याचं प्रशिक्षण देत असल्याची चर्चा आहे. शाहरुख खानने तर इस्राइली दिग्दर्शन लिओर राज या दिग्दर्शकालाही आर्यनच्या प्रशिक्षणासाठी पाचारण केल्याची चर्चा आहे.
नेटफ्लिक्सच्या लोकप्रिय ‘फौदा’ या वेबसीरिजचं दिग्दर्शन आणि लेखक लिओर यांनी केलं आहे. अशा प्रतिभाशाली माणसाच्या तालमीत आपला मुलगा तयार व्हावा, अशी शाहरुखची प्रामाणिक इच्छा आहे. आर्यनच्या बरोबरीनेच सुहानाही झोया अख्तरच्या वेबसीरिजमधुन मनोरंजनविश्वात पदार्पण करणार आहे. या सीरिजची झलक लोकांना पाहायला मिळाली असून ती नेटफ्लिक्सवरच प्रदर्शित होणार आहे. सुहाना बरोबरच या सीरिजमधून अमिताभ बच्चन यांचा नातूही या क्षेत्रात पदार्पण करणार आहे.
Bollywood Actor Shahrukh Khan Launch Aryan Soon
