मुंबई (इंडिया दर्पण वृत्तसेवा) – मुंबईला आणखी एक वंदे भारत ट्रेन मिळणार आहे. तशी माहिती रेल्वे राज्यमंत्री रावसाहेब दानवे यांनी दिली आहे. सद्यस्थितीत तीन वंदे भारत एक्सप्रेस मुंबईहून सुरू आहेत. त्यात मुंबई-अहमदाबा, मुंबई-शिर्डी, मुंबई-सोलापूर या ट्रेनचा समावेश आहे. आता आणखी एका एक्सप्रेसची भर पडणार आहे. ही नवी ट्रेन मुंबई-गोवा मार्गावर धावणार आहे.
मुंबई-गोवा मार्गावर वंदे भारत सेमी-हाय स्पीड एक्स्प्रेस ट्रेन लवकरच सुरू होणार आहे. त्याची माहिती महाराष्ट्र विधान परिषदेचे सदस्य निरंजन डावखरे यांनी दिली आहे. महाराष्ट्रातील आमदारांच्या शिष्टमंडळाने केंद्रीय रेल्वे राज्यमंत्री रावसाहेब दानवे यांची भेट घेतली होती. या बैठकीत केंद्रीय मंत्र्यांनी वंदे भारत एक्स्प्रेस मुंबई ते गोवा दरम्यान धावणार असल्याची माहिती गटाला दिली होती.
मुंबई-शिर्डी आणि मुंबई-सोलापूर मार्गावर नुकत्याच सुरू झालेल्या गाड्यांच्या धर्तीवर ही एक्स्प्रेस मुंबई ते गोवा दरम्यान चालवण्यात येणार असल्याचे दानवे यांनी सांगितले. मुंबई-गोवा रेल्वे मार्गाचे विद्युतीकरण पूर्ण झाले असून पाहणीनंतर नवीन रेल्वे सेवा सुरू करण्यात येईल, असे केंद्रीय मंत्र्यांनी शिष्टमंडळाला सांगितले. शिष्टमंडळाने ठाणे आणि कोकण विभागातील रेल्वेच्या अनेक मुद्द्यांवर मंत्र्यांशी भेटीदरम्यान चर्चा केली.
दरम्यान, रेल्वे प्रकल्पामुळे बाधित झालेल्या व्यक्तींना किंवा त्यांच्या नातेवाइकांना स्टॉलचे वाटप, शेतकऱ्यांसाठी प्रत्येक रेल्वे स्थानकावर मोबाईल स्टॉल्स, त्यांच्या आणि गाड्यांमधील अंतर कमी करण्यासाठी फलाटांची उंची वाढवणे, रेल्वे पुलांमुळे होणारा पूर टाळण्यासाठी प्लॅटफॉर्मची उंची वाढवणे आदी बाबींचा समावेश आहे. तसेच विविध उपाययोजना करण्याबाबतही चर्चा झाली आहे.
सावंतवाडी-दिवा रेल्वे सेवा दादरपर्यंत वाढवणे, झोपडपट्टी पुनर्वसन प्राधिकरण (एसआरए) योजनेंतर्गत रेल्वे रुळांवर राहणाऱ्यांचे पुनर्वसन आदी मुद्द्यांवर शिष्टमंडळाने दानवे यांच्याशी चर्चा केली. ठाण्यातील मुंब्रा स्थानकाचे नाव बदलून मुंब्रा देवी स्थानक करावे, अशी मागणीही आमदारांनी केली. यासंदर्भात राज्य सरकारने प्रस्ताव सादर केल्यानंतर कार्यवाही केली जाईल, असे आश्वासन दानवे यांनी दिले आहे.
Again one Vande Bharat Train Will Start from Mumbai
Mumbai Goa
