इंडिया दर्पण ऑनलाईन डेस्क – सिनेमाचे वेड कोणाला काय करायला लावेल, काही सांगता येत नाही. या वेडानेच भारावून जात भारतभरातून अनेकजण हे मुंबईचा रस्ता धरतात. आजही कितीतरी स्ट्रगलिंग ऍक्टर मुंबईत स्टुडिओचे उंबरे झिजवत असतात, तेही केवळ एका ब्रेकसाठी. अभिनेत्री, अभिनेता बनण्याची ही जिद्द काहींना रातोरात प्रसिद्धी झोतात आणते. परंतु नियती किती निष्ठुर असते याचा प्रत्यय एका अभिनेत्रीला आला आहे.
‘आशिकी’ या चित्रपटातून रातोरात प्रसिद्ध झालेली अभिनेत्री अनु अग्रवाल हिचा अचानक अपघात झाला त्यात जवळपास महिनाभर ती कोमात गेली. त्यानंतर मात्र बॉलिवूडपासून ती लांब झाली ती झालीच. एकेकाळी सर्वांना वेड लावलेल्या राहुल रॉय आणि अनु अग्रवाल या जोडीपैकी अनुला आज कोणी ओळखू देखील शकणार नाही. नुकतेच तिने तिचे काही फोटो सोशल मीडियावर शेअर केले आहेत.
९० चे दशक हे बॉलीवूडसाठी दर्जेदार चित्रपट आणि प्रेमाचं दशक होते, असच म्हणावं लागेल. याकाळात आलेल्या चित्रपटांनी युवकांच्या मनावर राज्य केलं. याच काळात राहुल रॉय आणि अभिनेत्री अनु अग्रवालचा ‘आशिकी’ हा चित्रपट प्रदर्शित झाला होता. या चित्रपटाने तरुणाईला अक्षरशः वेड केलं होत. या चित्रपटाच्या गाण्यांनी तेव्हा नव्हे तर रसिक आजही मंत्रमुग्ध होतात. त्यातील तरुणाईला ‘आशिकी’ शिकवणारी अभिनेत्री अनु अग्रवाल हॉट अँण्ड बोल्ड लूकसाठी नेहमीच चर्चेत असायची. चित्रपटांच्या निवडीसाठी ती बॉलिवूडमध्ये प्रसिद्ध होती.
अनु अग्रवालने आपल्या करिअरची सुरुवात मॉडेलिंगमधून केली होती. तिच्या अभिनयाची इंडस्ट्रीमध्ये चांगलीच प्रशंसा झाली. मात्र, या अभिनेत्रीला काही दिवसांतच अभिनयाला निरोप द्यावा लागला आणि तिने योगासनांना तिच्या आयुष्यातील महत्त्वाचा भाग बनवला. ‘आशिकी’ चित्रपटानंतर अनु अग्रवालचा मोठा कार अपघात झाला. ही अपघात इतका मोठा होता की, तब्बल २९ दिवस अभिनेत्री कोमात होती. अनु अग्रवालने तिच्या कारकिर्दीत केवळ दोन चित्रपटांत काम केले आहे, तिचा पहिला चित्रपट होता ‘आशिकी’ आणि १९९३ मध्ये आलेल्या दुसर्या चित्रपटाचे नाव होते खलनायिका. १९९९ मध्ये झालेल्या एका अपघातानंतर तिच्या शरीराला अर्धांगवायू झाला. त्यानंतर तिने कधीही इंडस्ट्रीकडे वळून पाहिले नाही.
एका वृत्तपत्राला दिलेल्या मुलाखतीवेळी तिने सांगितले की, १९९९ मध्ये माझा मोठा अपघात झाला होता, या अपघातानंतर मी कोमामध्ये गेलो. मी अपघातापूर्वी आश्रमात राहत होते, जिथे मला अध्यात्माची गोडी लागली. अपघातानंतर काय घडले हे मला आठवत नाही. पण मला माझं नाव आठवलं. २००१ च्या सुमारास, मी या प्रपंचातून निवृत्त झाले. त्यानंतर मी ध्यानधारणा सुरू केली. मुलाखतीत बोलताना अनुने सांगितले होते की, २००६ साली तिने बॉलिवूडमध्ये पुन्हा प्रवेश करण्याबद्दल विचार केला होता, ती बर्याच लोकांशी बोलू लागली आणि त्यांना भेटायला देखील गेली. पण त्या काळात लोकांनी तिला साथ दिली नाही. उलट लोकांनी तिला ट्रोल करायला सुरुवात केली. ती खूप अस्वस्थ झाली आणि तिने पुन्हा त्या मार्गापासून स्वतःला दूर केले. त्यानंतर तिने स्वतःच्या आयुष्यावर आधारित ‘ANUSUAL – MEMOIR OF A GIRL WHO CAME BACK FROM THE DEAD’ हे पुस्तक लिहिले. ते प्रचंड गाजले. आता अनुमध्ये खूप बदल झाला असून तिला ओळखणं शक्य नाही.
Actress Anu Aggarwal Life Journey Accident
Aashiqui Fame
