इंडिया दर्पण ऑनलाईन डेस्क – महिलांविरोधातील अत्याचारांमध्ये सातत्याने वाढ होताना दिसते आहे. या अत्याचारांना वय, धर्म, जात, श्रीमंत, गरीब या कशाचेही बंधन नाही. काही प्रकरणात तर प्रेमसंबंध ठेवून लैंगिक शोषण करण्यासोबतच त्यानंतर फसवणुकीचे प्रकार वाढत आहेत. असाच काहीसा प्रकार एका शिक्षिकेसोबत घडला आहे. दक्षिण मुंबईतल्या एका शिक्षिकेनं मलबार हिल पोलीस ठाण्यात टीव्ही अभिनेता अमित अंतिलविरोधात धमकावणं, लैंगिक शोषण आणि खंडणीचा गुन्हा दाखल केला आहे.
इंटिमेट फोटो सोशल मीडियावर लीक करण्याची धमकी देऊन ब्लॅकमेल केल्याचा आरोप संबंधित शिक्षिकेनं केला. एवढेच नव्हे तर पैसे दिले नाही तर मुलाचा जीव घेण्याची धमकी त्याने महिलेला दिली. अमित अंतिलने टेलिव्हिजनवरील काही रिॲलिटी शोज आणि गुन्हेगारी कार्यक्रमांमध्ये काम केलं आहे. तक्रार दाखल करणारी शिक्षिका ही ४२ वर्षांची असून अमितने गेल्या वर्षी तिच्याशी मैत्री केली. त्यानंतर दोघं नियमितपणे एकमेकांना भेटू लागले. या भेटींदरम्यान अमितने तिच्या नकळत तिचे काही इंटिमेट फोटो काढले.
या फोटोंच्या बदल्यात त्याने आधी ९५ हजार आणि नंतर साडेपाच लाख रुपयांची मागणी केली. ही मागणी पूर्ण करूनही त्याने फोटो परत केले नाहीत. उलट अजून १८ लाखांची मागणी केली. त्यानंतर मात्र महिलेनं तक्रार दाखल केली, अशी माहिती पोलिसांनी दिली. आणि यावेळी जर मागणी पूर्ण केली नाही तर माझ्या मुलाचा जीव घेण्याची धमकी दिल्याचा आरोप महिलेनं केला आहे.
याप्रकरणी पोलिसांचा तपास सुरू असून भारतीय दंड संहितेच्या कलम ३५४-अ, ५०६, ३८४, ५०४, ४१७ अंतर्गत अमितविरोधात गुन्हा दाखल करण्यात आला. अमित अंतिल हा मूळचा हरियाणाचा राहणारा आहे. या संपूर्ण प्रकरणावर अद्याप त्याची कोणतीही प्रतिक्रिया समोर आलेली नाही.
Actor Sexual Abuse Teacher Photo Leak Threat
