इंडिया दर्पण ऑनलाईन डेस्क – बॉलीवूडमध्ये एकत्र काम करणाऱ्या अनेक जोड्या जुळतात आणि तुटतातही. काही क्वचितच जोड्या या कायमस्वरूपी एकत्र दिसतात. धर्मेंद्र – हेमा मालिनी, अमिताभ – जया ही त्याचीच काही उदाहरणे. कपूर खानदानातील रणधीर आणि बबिता यांचेही लव्ह मॅरेज झाले होते. मात्र, गेली जवळपास ३५ वर्षे ते घटस्फोट न घेता एकमेकांपासून वेगळे राहत होते. आता तेही एकत्र राहणार असल्याची माहिती आहे.
अभिनेत्री करीना कपूर – खान आणि करिश्मा कपूर यांचे पालक आता एकत्र राहू लागले आहेत. ज्येष्ठ अभिनेते रणधीर कपूर आणि अभिनेत्री बबिता यांच्यातील दुरावा आता संपला आहे. रणधीर – बबिता यांचे १९७१ मध्ये लग्न झालं आणि १९८८ मध्ये ते वेगळे झाले. त्यानंतर आता तब्बल ३५ वर्षांनी पुन्हा एकत्र आले आहेत. विशेष म्हणजे इतके दिवस दूर राहूनही त्यांनी घटस्फोट घेतला नव्हता. आता पुन्हा एकत्र राहण्याच्या त्यांच्या निर्णयाने केवळ कुटुंबीय आणि नातेवाईकच खूश नाहीत तर त्यांचे चाहतेही खूश झाले आहेत. मीडिया रिपोर्ट्सनुसार, बबिता सर्व सामान घेऊन पतीच्या वांद्रे येथील नवीन घरात राहण्यासाठी पोहोचल्या आहेत.
बबिता आणि रणधीर कपूर सोबत राहणार असल्याने त्यांच्या मुलीही आनंदी आहेत. आता उतारवयात दोघंही एकाच छताखाली राहू शकतील आणि एकमेकांची काळजी घेऊ शकतील. प्रेमविवाह असूनही लग्नानंतरही ते मतभेदांमुळे वेगळे राहिले. अशा परिस्थितीत ३५ वर्षांनंतर त्यांचं पुन्हा एकत्र येणं ही सर्वांसाठी मोठी गोष्ट आहे. रणधीर कपूर यांची तब्येत आता फार चांगली नसते, बबिता त्यांच्याजवळ असल्याने त्यांची व्यवस्थित काळजी घेता येईल.
रणधीर कपूर आणि बबिता यांची पहिली भेट १९६९ च्या ‘संगम’ चित्रपटाच्या सेटवर झाली होती. या चित्रपटाच्या माध्यमातून दोघांची एकमेकांची ओळख झाली आणि नंतर हळूहळू त्यांच्यात भेटीगाठी वाढत गेल्या. राज कपूर यांना रणधीर कपूर यांच्या अफेअरबद्दल कळताच “तू तिच्याशी लग्न कधी करणार आहेस?” असा प्रश्न त्यांना विचारला. तेव्हा या दोघांचाही लग्नाचा कोणताही प्लॅन नव्हता. पण घरच्यांच्या सांगण्यावरून त्यांनी ६ नोव्हेंबर १९७१ रोजी लग्नगाठ बांधली.
८०च्या दशकात रणधीर कपूर यांचे चित्रपट बॉक्स ऑफिसवर फारशी कमाई करू शकत नव्हते. त्यांचा कारकिर्दीचा आलेख खाली घसरत होता. त्यामुळे ते खूप अस्वस्थ होत होते, आणि त्यांनी दारू पिण्यास सुरुवात केली. त्यांच्या दारू पिण्यामुळे बबिता यांनाही त्रास होऊ लागला. यावरून दोघांमध्ये अनेकदा वाद झाले. तर दुसरीकडे मुलींनी चित्रपटात काम करावं, हेही रणधीर यांना मंजूर नव्हतं, त्यामुळेही त्यांच्यात वाद व्हायचे. अशातच १९८८ साली त्यांच्या नात्यात दुरावा आला आणि बबिता यांनी आपल्या दोन्ही मुलींना घेऊन वेगळे राहायला सुरुवात केली.
Actor Randhir Kapoor Babita Will Come together after 35 years
