इंडिया दर्पण ऑनलाईन डेस्क – कलाकार मग तो छोट्या पडद्यावरील असो वा मोठ्या पडद्यावरील त्याच्या वैयक्तिक आयुष्याबद्दल चाहत्यांना नेहमीच फार उत्सुकता असते. त्यांच्या आयुष्यातील आनंदाचे प्रसंग हे चाहत्यांसाठी देखील आनंदाचे असतात. तर दुःखाचे प्रसंग हे काळजी वाढवणारे असतात. बॉलिवूड आणि टीव्ही अभिनेता मोहित रैना सध्या सोशल मीडियावर चांगलाच चर्चेत आहे. मोहित रैनाच्या खासगी आयुष्याबद्दल सध्या चर्चा सुरू आहे. मोहितचे वैवाहिक आयुष्य बिनसल्याची चर्चा आहे.
मोहितने या वर्षाच्या सुरुवातीला म्हणजेच जानेवारी २०२२मध्ये अदिती शर्माशी लग्न केलं. पण आता या दोघांमध्ये ‘सारं काही आलबेल’ नसल्याच्या चर्चा आहेत. पत्नीबरोबर वाद असल्याने त्याने इन्स्टाग्रामवरून लग्नाचे फोटो डिलिट केल्याची चर्चा देखील सोशल मीडियावर रंगताना दिसते आहे. वर्षाच्या सुरुवातीला मोहितने अचानक लग्नाचे फोटो शेअर करत चाहत्यांना ही गुड न्यूज दिली होती. पण आता मात्र त्याने लग्नाचे सर्व फोटो डिलिट केले आहेत. एवढंच नव्हे तर लग्नानंतर पत्नीबरोबर शेअर केलेले सगळेच फोटो त्याने डिलिट केले आहेत. त्यामुळे आता ही जोडी विभक्त होणार असल्याच्या चर्चांना उधाण आलं आहे.
मोहित रैनाच्या इन्स्टाग्रामवर पत्नी अदितीसह एकच फोटो आहे. हा फोटो १ जून २०२२ ला पोस्ट केलेला आहे. या फोटोमध्ये मोहितने अदितीला खांद्यावर उचलून घेतलं आहे. हा फोटो पाहून एका युजरने, ”तुम्ही दोघं एकत्र फोटो का पोस्ट करत नाही. मी पाहिलं आहे की तुम्ही एकमेकांना सोशल मीडियावर फॉलो देखील करत नाही आणि लग्नाचे फोटोही डिलिट केले आहेत”, असे म्हटले आहे. सोशल मीडियावर सुरू असलेल्या या चर्चांवर अदिती किंवा मोहितने कोणतीही अधिकृत प्रतिक्रिया दिलेली नाही.
मोहित रैनाने लग्नानंतर दिलेल्या एका मुलाखतीत सांगितलं होतं की, तो एका कॉमन फ्रेंडच्या माध्यमातून अदितीला भेटला होता. मोहितनेच अदितीला प्रपोज केलं. काही काळ एकमेकांना डेट केल्यानंतर त्यांनी लग्न केलं. त्याची ‘देवों के देव महादेव’ मालिका बरीच गाजली होती. या मालिकेनेच त्याला स्वतःची वेगळी ओळख दिली होती.
Actor Mohit Raina Deleted Wedding Photos