नाशिक (इंडिया दर्पण वृत्तसेवा) – कोयता गँगला पोलिसांनी आपल्या रडारवर घेतले असून गुरूवारी वेगवेगळया भागात दहशत माजविणा-या तिघांवर पोलिसांनी कारवाई करुन त्यांच्या ताब्यातून धारदार कोयते जप्त केले आहेत. याप्रकरणी आडगाव व नाशिकरोड पोलिस ठाण्यात वेगवेगळे गुन्हे दाखल करण्यात आले आहेत.
औद्योगीक वसाहतीतील रियाबल कंपनी भागात एक तरूण धारदार शस्त्र घेवून फिरत असल्याच्या माहिती वरून अंबड पोलिसांनी धाव घेत अशपाक रफिक पठाण (२२ रा.रियाबल कंपनी पाठीमागे,बजरंगवाडी) या संशयिताची अंगझडती घेतली असता त्याच्या ताब्यात कोयता मिळून आला. संशयितास अटक करीत कोयता जप्त करण्यात आला असून पोलिस शिपाई राठोड यांनी दिलेल्या तक्रारीवरून अंबड पोलिस ठाण्यात शस्त्रबंदी अधिनियम कायद्यान्वये गुन्हा दाखल करण्यात आला आहे. अधिक तपास पोलिस नाईक आवारे करीत आहेत. दुसरे प्रकार नाशिकरोड भागात समोर आले. मालधक्कारोडवरील मातोश्री रमाई आंबेडकर नगर भागात एक सराईत गुन्हेगार हातात शस्त्र घेवून नागरीकांना शिवीगाळ करीत दहशत माजवित असल्याची माहिती पोलिसांना मिळाली होती. त्यानुसार पथकाने धाव घेत श्याम गोविंद कसबे या पोलिस रेकॉर्डवरील गुन्हेगाराच्या मुसक्या आवळल्या असता त्यांच्या अंगझडतीत लोखंडी कोयता मिळून आला. याबाबत पोलिस शिपाई राकेश बोडके यांनी तक्रार दाखल केली आहे. तर कृष्णा संजय थोरात (१९ रा.म्हाडा बिल्डींग,अश्विनी कॉलनी,सामनगावरोड) हा युवक जयप्रकाश नगर येथील पाटालगत दहशत माजवितांना मिळून आला. त्याच्या अंगझडतीत धारदार कोयता मिळून आला असून याप्रकरणी पोलिस शिपाई धकाते यांनी तक्रार दिली आहे. दोन्ही घटनांप्रकरणी नाशिकरोड पोलिस ठाण्यात वेगवेगळे गुन्हे दाखल करण्यात आले असून अधिक तपास हवालदार काकड व पोलिस नाईक घेगडमल करीत आहेत.