इंडिया दर्पण ऑनलाईन डेस्क – ज्येष्ठ उद्योगपती मुकेश अंबानी यांच्या नेतृत्वाखालील रिलायन्स इंडस्ट्रीजची उपकंपनी RSBVLने मोठा निर्णय घेतला आहे. अमेरिकन फर्म सनमिना कॉर्पोरेशनच्या मदतीने रिलायन्स आता सुमारे ३३०० कोटी रुपयांच्या मुल्यांकनासह इलेक्ट्रॉनिक्स उत्पादन सुरू करणार आहेत. त्यासाठीचा करार पूर्ण करण्यात आला आहे. दोन्ही कंपन्यांनी मंगळवारी जारी केलेल्या संयुक्त निवेदनात ही माहिती देण्यात आली आहे.
रिलायन्स स्ट्रॅटेजिक बिझनेस व्हेंचर्स लिमिटेड (RSBVL) या उपक्रमात ५०.१ टक्के तर सनमिनाकडे ४९.९ टक्के हिस्सा असेल. RSBVL १६७० कोटी रुपयांची गुंतवणूक करून सनमीनाच्या सध्याच्या इंडिया युनिटमधील हा स्टेक घेणार आहे. या गुंतवणुकीनंतर, सनमिनाच्या भारतातील २०० दशलक्ष डॉलर भांडवली गुंतवणूक आता संयुक्त उपक्रमात रूपांतर होईल.
२०२१-२२ या आर्थिक वर्षात RSBVL चा महसूल १४७८ कोटी रुपये आणि निव्वळ नफा १७९.८ कोटी रुपये होता. मार्च २०२२ अखेर त्याची एकूण गुंतवणूक १०,८५७.७ कोटी रुपये होती. दोन्ही कंपन्यांमधील संयुक्त उपक्रमातील दैनंदिन कामकाज सन्मिनाच्या चेन्नईस्थित व्यवस्थापन संघाद्वारे व्यवस्थापित केले जाईल. हा उपक्रम भारतात जागतिक दर्जाची इलेक्ट्रॉनिक्स उत्पादन सुविधा स्थापन करेल, असे निवेदनात म्हटले आहे. हा उपक्रम उच्च तंत्रज्ञान पायाभूत सुविधा हार्डवेअर आणि कम्युनिकेशन नेटवर्किंग, वैद्यकीय आणि आरोग्य प्रणाली आणि संरक्षण आणि वैमानिक क्षेत्रांवर विशेष भर देईल.
Reliance Investment in American Company
Electronics Business Industry