मुंबई (इंडिया दर्पण वृत्तसेवा) – मुख्यमंत्री एकनाथ शिंदे यांनी दोन महत्त्वाचे निर्णय रविवारी जाहीर केले. यातील पहिला म्हणजे आयपीएस अधिकारी ब्रिजेश सिंह यांची मुख्यमंत्री कार्यालयाचे सचिव म्हणून नियुक्ती करण्यात आली आहे. तर माजी सनदी अधिकारी प्रवीण परदेशी यांना मित्रा संस्थेच्या मुख्य कार्यकारी अधिकारीपदी नियुक्त करण्यात आले आहे. दरम्यान, या नियुक्तीवरुन राजकीय वर्तुळात चर्चांना उधाण आले आहे. परदेशी आणि सिंह हे दोन्ही अधिकारी फडणवीसांचे अत्यंत विश्वासू समजले जातात. मुख्यमंत्री एकनाथ शिंदेंवर अंकुश ठेवण्यासाठी फडणवीसांकडून या दोन्ही अधिकाऱ्यांची नियुक्ती करण्यात आल्याची टीका विरोधकांकडून होत आहे.
देवेंद्र फडणवीस राज्याचे मुख्यमंत्री असताना प्रवीणसिंह परदेशी त्यांचे अतिरिक्त सचिव होते. त्यावेळी त्यांच्या कार्यपद्धतीचे खूप कौतुक झाले. कुशल सनदी अधिकारी म्हणून त्यांची ओळख होती. त्यानंतर २०२० मध्ये मुंबई महानगरपालिका आयुक्त पदावरून त्यांची बदली करण्यात आली. मग ते केंद्र सरकारच्या सेवेत रुजू झाले. दरम्यान शिंदे-फडणवीस सरकार राज्यात आले. त्यामुळे परदेशी मोठ्या भूमिकेत राज्यात परततील असे सहा महिन्यांपूर्वी वाटले होते. मात्र असे झाले नाही. आता त्यांची नियुक्ती महाराष्ट्र इन्स्टीट्युशन फॉर ट्रान्सफॉर्मेशन (मित्रा) या संस्थेच्या मुख्य कार्यकारी अधिकारीपदी करण्यात आली. राज्याच्या प्रगतीसाठी आवश्यक असलेले निर्णय घेण्यासाठी राज्य सरकारने या संस्थेची स्थापना केली आहे.
उपमुख्यमंत्र्यांच्या विश्वासू अधिकाऱ्यांची मुख्यमंत्र्यांच्या कार्यालयात नेमणूक होण्याचा अर्थ काय बरं?🤔
— Sachin Sawant सचिन सावंत (@sachin_inc) February 20, 2023
ब्रिजेश सिंग सीएमओत
सध्या गृहरक्षक दलात अतिरिक्त महासंचालक म्हणून कार्यरत असलेले ब्रिजेश सिंह आता मुख्यमंत्री कार्यालयात सचिव म्हणून रुजू होत आहेत. ते आयपीएस अधिकारी असून त्यांच्या कार्यपद्धतीचेही बरेच कौतुक होत आले आहे. मुख्यमंत्र्यांचे अतिरिक्त मुख्य सचिव भूषण गगराणी आणि प्रधान सचिव विकास खरगे यांच्या टीममध्ये त्यांचा समावेश असणार आहे.
परदेशींबाबत आश्चर्य
देवेंद्र फडणवीस यांच्या टीममधील सर्वांत विश्वासू अधिकारी म्हणून एकेकाळी ओळखले जाणारे प्रवीण परदेशी पुन्हा मुख्यमंत्री किंवा उपमुख्यमंत्र्यांच्या कार्यालयात महत्त्वाच्या जबाबदारीत रुजू होतील, असा अंदाज वर्तवण्यात आला होता. मात्र त्यांची नियुक्ती सरकारच्या एका संस्थेत करण्यात आल्याने आश्चर्य व्यक्त होत आहे. या नियुक्तीमागे मोठे राजकारण असल्याचेही बोलले जात आहे.
2 IAS Officers CMO Appointment Politics Allegation