नवी दिल्ली – देशाच्या सरहद्दीजवळच्या आणि तटवर्ती भागातील १७३ जिल्ह्यांमधे राष्ट्रीय छात्रसेनेचा (एनसीसी) विस्तार करण्याच्या योजनेला मंजुरी देण्यात आली आहे. तशी माहिती संरक्षणमंत्री राजनाथ सिंग यांनी दिली आहे. यामुळे देशभरातील अनेक शाळांमध्ये एनसीसी चे केंद्र सुरू होणार आहे.
सद्यस्थितीत एनसीसीचे कामकाज मर्यादित आहे. तसेच, या विद्यार्थ्यांना सीमावर्ती भागात नियुक्ती दिली जात नाही. मात्र, आता केंद्र सरकारने एनसीसीला अधिक बळ देण्याचे निश्चित केले आहे. नव्या विस्ताराअंतर्गत एक हजारपेक्षा जास्त शाळा व महाविद्यालयांमधे राष्ट्रीय छात्र सेना सुरु करण्यात येणार आहे. सुमारे १ लाख छात्रसैनिकांची भरतीही होणार आहे. त्यांच्या प्रशिक्षणासाठी लष्कराची ५३, नौदलाची २० आणि हवाईदलाची १० अशा एकूण ८३ युनिट्सची क्षमता वाढवण्यात येणार आहे.
सीमाभागात लष्करातर्फे, तटवर्ती भागात नौदलातर्फे तर हवाईदल ठाण्यांजवळच्या परिसरात हवाईदलातर्फे प्रशिक्षण देण्यात येईल. यामुळे विद्यार्थ्यांना प्रत्यक्ष आघाडीवर लष्करी जीवनाचा आणि शिस्तीचा अनुभव मिळेल तसंच सेनादलात भरती होण्याची प्रेरणा मिळेल. राज्य सरकारांच्या सहयोगाने ही योजना राबवण्यात येईल. यानिमित्ताने एनसीसीला अधिक महत्त्व प्राप्त होणार असून एनसीसीत सहभागी होण्यासाठी विद्यार्थ्यांचा कल वाढणार आहे.
