इंडिया दर्पण ऑनलाईन डेस्क – छोट्या पडद्यावरील रिऍलिटी शो हे प्रेक्षकांचे अत्यंत आवडते असतात. त्यातही सारेगमप हा संगीतमय कार्यक्रम प्रेक्षकांचा विशेष आवडता आहे. काही वर्षांपूर्वी सारेगमपचे लिटिल चॅम्प्स अर्थात लहान मुलांचे पर्व आले होते. ते फारच लोकप्रिय ठरले होते. अभिनेत्री पल्लवी जोशी यांचे खुमासदार सूत्रसंचालन आणि पाच चिमुरडे गायक हे या कार्यक्रमाचं सगळ्यात मोठं यश. आता पुन्हा एकदा या कार्यक्रमाचे नवीन पर्व येऊ घातले आहे. या कार्यक्रमाने अनेक उत्तमोत्तम गायक आणि गायिका महाराष्ट्राला आणि सिनेसृष्टीला दिले आहेत.
प्रेक्षकांना उत्सुकता
‘सारेगमप लिटिल चॅम्प्स’ या कार्यक्रमाचं नवीन पर्व लवकरच प्रेक्षकांच्या भेटीला येणार आहे. नुकताच या कार्यक्रमाचा एक प्रोमो समोर आला आहे. या नव्या पर्वाबद्दलची प्रेक्षकांची उत्सुकता आता आणखी वाढली आहे. आजवर या कार्यक्रमाची अनेक नवनवीन पर्व आतापर्यंत झाली आहेत. विशेष म्हणजे, ते प्रेक्षकांच्या पसंतीसही उतरले आहेत. यंदाचं हे पर्व जरा वेगळे असणार आहे. ‘झी मराठी’वर ९ ऑगस्ट पासून हा कार्यक्रम सुरू होणार असून बुधवार ते शनिवार रात्री ९.३० वाजता हा कार्यक्रम रसिकांच्या भेटीला येणार आहे.
परीक्षक कोण?
या लोकप्रिय कार्यक्रमासाठी परीक्षक कोण असतील, याचीही उत्सुकता असतेच. सगळ्यात पहिल्या पर्वात अवधूत गुप्ते आणि वैशाली सामंत हे दोघे परीक्षक होते. यावेळी सलील कुलकर्णी आणि वैशाली माडे हे दोघे परीक्षक असणार आहेत. वैशाली माडे ही गायिका देखील ‘सारेगमप’मधूनच समोर आली आहे. पूर्वी स्पर्धक असलेली वैशाली आता परीक्षकाच्या भूमिकेत दिसणार आहे. तर सलील कुलकर्णी यांनी याआधी सारेगमपचे परीक्षक म्हणून काम केले आहे. या पर्वात सुप्रसिद्ध गायक सुरेश वाडकर हे एका खास भूमिकेत दिसणार आहेत.
