इंडिया दर्पण ऑनलाईन डेस्क – चांगल्या मालिकांना टीआरपीचा फटका बसतो, हे आपण नेहमीच पाहतो. याचाच फटका बसून अनेक चांगल्या मालिका बंद होतात. असाच फटका बसल्याने ‘झी मराठी’वरील ‘लोकमान्य’ ही मालिका बंद होणार असल्याची बातमी आली होती. त्यापाठोपाठ आता आणखी एक मालिका बंद होणार असल्याची माहिती मिळते आहे.
छोट्या पडद्यावरील मालिका या घरोघरी अत्यंत आवडीने पाहिल्या जातात. त्यामुळेच या वाहिन्यांमध्ये कायम स्पर्धा सुरू असते. त्यातही झी मराठी विषयांच्या वेगळेपणामुळे तिचं पारडं कायमच थोडं जड असे. कालांतराने वाहिन्या वाढल्या. त्यामुळे गेली काही वर्ष झी मराठी प्रेक्षकांचं मनोरंजन करण्यात कमी पडताना दिसते. नव्या मालिकांसाठी जुन्या मालिका एकापाठोपाठ एक प्रेक्षकांचा निरोप घेत आहेत. काही दिवसांपूर्वीच झी मराठीवरील ‘लोकमान्य’ ही मालिका प्रेक्षकांचा निरोप घेणार असल्याची बातमी आली होती. आता आणखी एक मालिका प्रेक्षकांचा निरोप घेणार आहे.
झी मराठीवर लवकरच नवीन मालिका येऊ घातल्या आहेत. यातील काही मालिकांचे प्रोमो नुकतेच प्रदर्शित करण्यात आले आहेत. या नवीन मालिकांसाठी जुन्या मालिका संपवण्यात येणार आहेत. कमी टीआरपीमुळे या मालिका बंद होणार आहेत. ‘लोकमान्य’ नंतर ‘३६ गुणी जोडी’ ही मालिका प्रेक्षकांचा निरोप घेणार आहे. काही महिन्यांपूर्वीच प्रदर्शित झालेली ‘३६ गुणी जोडी’ आता रंजक वळणावर पोहोचली होती. तरीही केवळ टीआरपी नसल्याने ती बंद होणार आहे. तर तिच्या जागी दुसरी मालिका ‘सारं काही तिच्यासाठी’ दाखवण्यात येणार आहे. दोन सख्ख्या बहिणींच्या नात्यावर आधारलेली ही मालिका आहे. २० वर्षांपूर्वी त्यांची ताटातूट कशी होते आणि पुढे त्यांचं नातं कसं सांधलं जातं हे या मालिकेत दाखवण्यात येणार आहे. प्रोमो पाहून तरी प्रेक्षक या नव्या मालिकेसाठी उत्सुक आहेत.
‘३६ गुणी जोडी’ या मालिकेच्या टाइम स्लॉटवर ‘अप्पी आमची कलेक्टर’ ही मालिका दाखवण्यात येण्याची शक्यता आहे. आणि या मालिकेच्या जागी म्हणजे ७ वाजता ‘सारं काही तुझ्यासाठी’ दाखवण्यात येणार आहे.
