गडचिरोली (इंडिया दर्पण वृत्तसेवा) – एसटी महामंडळाच्या बसमध्ये महिलांना तिकीटांच्या दरात पन्नास टक्के सवलत देण्यात येत आहे. सरकारच्या या निर्णयाचा महामंडळाला फायदा होत आहे. या पार्श्वभूमीवर खासगी ट्रॅव्हल्स कंपन्यांनीदेखील महिलांसाठी अर्धे तिकीट लागू करण्याचा महत्त्वपूर्ण निर्णय घेतला आहे.
अर्ध्या दरात तिकीट असल्याने महिलांची पसंती मिळत एसटीला मिळत आहे. या निर्णयाची अंमलबजावणी झाल्यापासून राज्यातील प्रत्येकच जिल्ह्यात महिला मोठ्या संख्येने एसटी महमंडळाच्या बसने प्रवास करताहेत. याचा थेट फटका खासगी ट्रॅव्हल्स कंपन्यांना बसत आहे. परिणामत: गडचिरोली-चंद्रपूर ट्रॅव्हल्स असोसिशनने आता खासगी बसमध्येही महिलांना निम्म्या दरात तिकीट देण्याचा निर्णय घेतला आहे.
यासंदर्भात नुकतीच गडचिरोली-चंद्रपूर ट्रॅव्हल्स असोसिशनच्या पदाधिकाऱ्यांनी बैठक झाली. बैठकीमध्ये गडचिरोली–चंद्रपूर मार्गावर खाजगी ट्रॅव्हल्समधून प्रवास करणाऱ्या महिलांना तिकीट दरात पन्नास टक्के सूट देण्याचे जाहीर केले आहे. यामुळे आता खाजगी बसेसमध्ये सुध्दा महिला प्रवाशांची संख्या पूर्वपदावर येईल असा विश्वास संघटनेचे सदस्य राजू कावळे यांनी व्यक्त केला आहे.
चारच दिवसांत ४८ लाख महिलांचा प्रवास
महिलांना अर्ध्या तिकिटात प्रवास हा निर्णय राज्य सरकारने घेतला. त्यानंतर राज्यभरातील बसमध्ये महिला प्रवाश्यांची संख्या मोठ्या प्रमाणावर वाढली. निर्णयानंतर चारच दिवसात राज्यात सुमारे ४८ लाख महिला प्रवाश्यानी प्रवास केलाय. जो एकूण प्रवासी संख्येच्या ३० टक्के आहे. सरकारच्या या निर्णयानंतर राज्यभरातील बसस्थानकांवर आणि बसमध्येही महिला प्रवाशांची गर्दी मोठ्या प्रमाणात वाढली. ताई, माई, अक्का, काकू, मावशी आणि आजी सगळ्या प्रवासाला निघाल्या आहेत.
Women’s Also get 50 Percent Ticket Concession in Private Travel Bus
