नाशिक (इंडिया दर्पण वृत्तसेवा) – धावत्या रेल्वेत प्रसुतीकळा सुरू होऊन डिलिव्हरी झाल्याच्या घटना बरेचदा ऐकण्यात, वाचण्यात येत असतात. असाच एक प्रकार सेवाग्राम एक्सप्रेसमध्ये नाशिक रेल्वेस्टेशनदरम्यान घडला. मुख्य म्हणजे ही घटना नाशिकजवळ घडल्यामुळे संबंधित महिलेने स्वत:च्या मुलाचे नाव नाशिक ठेवल्याची सर्वत्र चर्चा आहे.
मुंबईहून नेहमीप्रमाणे सेवाग्राम एक्सप्रेस निघाली. नाशिक स्टेशन जवळ येऊ लागले असता यातील एका एका महिलेला प्रसूतीकळा सुरू झाल्या. तिच्यासोबत असलेल्या इतर महिलांनी संपूर्ण परिस्थिती हाताळत डिलीव्हरी पार पाडली. एका गुटगुटीत बाळाचा जन्म झाला. त्यामुळे नाव काय ठेवणार, हा प्रश्न विचारला असता त्या महिलेने क्षणाचाही विलंब न करता ‘नाशिक’ असे नाव ठेवल्याचे जाहीर करून टाकले. तिच्या या उत्तराची चर्चा संपूर्ण रेल्वेत झपाट्याने पसरली. ती ऐकून अनेकांनी तिची भेट घेतली, बाळाला आशीर्वाद दिलेत. तर काहींनी जमेल ती आर्थिक मदतदेखील देऊ केली. धावत्या रेल्वेतील बाळाच्या जन्माच्या या घटनेची सध्या सर्वत्र चर्चा सुरू आहे.
बाळाला जन्म दिलेली महिला आणि तिच्यासोबत असलेल्या सहकारी महिला या मुंबईत कॅटरिंगचे काम करतात. त्या मुंबईहून यवतमाळकडे निघाल्या होत्या. प्रवासादरम्यान प्रसुतीची घटना घडली.
Women Delivery in Railway Child Name Nashik
