इंडिया दर्पण ऑनलाईन डेस्क – पश्चिम बंगालमधील शालेय नोकरी घोटाळ्यात अटक करण्यात आलेले राज्य सरकारचे मंत्री पार्थ चॅटर्जी यांची सहकारी अर्पिता मुखर्जी हिने मोठा खुलासा केला आहे. अर्पिता मुखर्जी सांगते की पार्थ चॅटर्जी तिच्या घराचा वापर ‘मिनी बँक’ म्हणून करत असे.
अर्पिताने सांगितले की, पार्थ चॅटर्जी तिच्या घरातच पैसे ठेवत असे. ईडीच्या सूत्रांनी ही माहिती दिली आहे. त्याचवेळी ईडीच्या या दाव्याला अर्पिता मुखर्जीच्या वकिलांकडून आव्हान दिले जाऊ शकते. वकिलांचे म्हणणे आहे की ईडीकडून तपासाचा तपशील प्रसारमाध्यमांमधून बाहेर येत आहे, जो चुकीचा आहे. यासोबतच केंद्रीय यंत्रणांकडून नोंदवल्या जाणाऱ्या खटल्यांमध्ये वकिलांना दोषी ठरविण्याच्या कमी दरावरही प्रश्न उपस्थित केला जाऊ शकतो.
पश्चिम बंगालच्या शिक्षक भरती घोटाळ्याची सध्या मोठ्या प्रमाणात चर्चा सुरू आहे. या घोटाळ्यातील आरोपी कॅबिनेट मंत्री पार्थ चॅटर्जी आणि अर्पिता मुखर्जी यांच्या अडचणी वाढण्याची शक्यता आहे. कारण नुकतेच या प्रकरणाविषयी ईडीने कोलकाता हायकोर्टात महत्त्वाची माहिती समोर ठेवली आहे. या माहितीतून एका काळ्या डायरीचा मुद्दा समोर आला असून ही काळी डायरी पार्थ चॅटर्जी यांची नीकटवर्तीय अभिनेत्री अर्पिता मुखर्जी हिच्या घरातून जप्त करण्यात आली आहे.
पश्चिम बंगालमधील शिक्षक भरती घोटाळ्यामुळे खळबळ माजली आहे. सोमवारी या प्रकरणात आरोपी अर्पिताची चौकशी करण्यात आली. दर ४८ तासांनी चौकशी करण्यात येणार असून रात्री ९ ते सकाळी ६ पर्यंत त्यांची चौकशी करु नये असे कोर्टाने सांगितले आहे. तसेच पार्थ चॅटर्जी यांना मंगळवारी कोलकात्यात आणण्यात आले असून आता त्यांची प्रकृती उत्तम असल्याचे अहवालातून सांगण्यात आले आहे. दरम्यान तृणमूल काँग्रेसचे आणखी एक आमदार माणिक भट्टाचार्य यांचीही ईडी चौकशी करणार आहेत.
अर्पिताला मुखर्जीला सोमवारी कोर्टात हजर करण्यात आले. त्याच्या आधी अर्पिताने पार्थ चॅटर्जी यांच्याशी असलेले संबंध आणि उत्पन्नाच्या साधनाबाबत कोणतीही माहिती ईडीला दिली नसल्याचे सांगण्यात आले आहे. पार्थ आणि अर्पिता यांचा एकमेकांशी संबंध दाखवण्याचा प्रयचत्न ईडीकडून करण्यात येतो आहे, असे अर्पिता यांचे म्हणणे आहे.
या चौकशीत समोर आलेल्या ४० पानांच्या डायरीत शिक्षक भरती घोटाळ्याशी संबंधित महत्त्वाच्या नोंदी असल्याचे ईडीने म्हणले आहे. यातल्या ४० पैकी १६ पानांवर बेकायदेशीररित्या घेतलेल्या पैशांच्या देवाणघेवाणीचा उल्लेख आहे. याबरोबरच उच्च शिक्षण विभागाचे एक पाकिटही अर्पिताच्या घरी सापडले असून त्यात ५ लाखांची कॅश असल्याचे ईडीने सांगितले आहे. दोन कंपन्यांत पैसे व्यवहाराचे पुरावेही मिळाले आहेत. या कंपन्यांच्या माध्यमातूनच घोटाळ्याची रक्कम ट्रान्सफर करण्यात आल्याचा ईडीचा दावा आहे. या सगळ्या काळात पार्थ चॅटर्जी आणि अर्पिता मुखर्जी हे एकमेकांशी संपर्कात होते असेही स्पष्ट होते आहे. अजूनही काही महत्त्वाची कागदपत्रे या ठिकाणी मिळाली असून त्यात पार्थ यांची या घोटाळ्यात महत्त्वाची भूमिका असल्याचे स्पष्ट झाले आहे. पुढील चौकशीत आणखी महत्वाच्या बाबी समोर येईल असे ईडीकडून सांगितले जात आहे.
West Bengal Arpita Mukherjee ED Enquiry Clarification Partha Chatterjee
