इंडिया दर्पण
– विचार पुष्प –
सतत हा प्रयत्न आपण करू या
कोणी आपल्याशी वागताना अतिप्रसंग करतो, आपली पायरी सोडून वागतो व आपल्या मनाला त्यामुळे त्रास होतो. अर्थात अशा गोष्टींनी त्रासणे हे साधकास शोभत नाही, हे माहीत असल्यामुळे आपण तितिक्षेचा मार्ग स्वीकारतो. मुकाट्याने सर्व काही पोटात ठेवतो.
पण जरा अधिक खोल जाऊन पाहता असे दिसते की, आपल्या अंतरंगी त्या दुष्ट स्पर्शाचा संस्कार झालेला असतो. फक्त त्याला आपण बाहेर दिसू दिलेले नसते. ही स्थिती साधनेच्या दृष्टीने प्रगतीस नेणारी नाही.
खरी समता तेव्हाच अंगी बाणेल, जेव्हा सर्वत्र परमेश्वराचे अस्तित्व आपण अनुभवू लागू. सर्व घटनांतील ईश्वरी योजनासूत्र पाहण्यास आपण समर्थ होऊ. तेव्हा, हा अभ्यास वाढविण्याचा सतत प्रयत्न आपण करू या.
