इंडिया दर्पण ऑनलाईन डेस्क – अब्जाधीश इलॉन मस्क हे ट्विटर वापरकर्त्यांना आणखी एक धक्का देण्याच्या तयारीत आहेत. रिपोर्ट्सनुसार, ट्विटर वापरण्यासाठी सर्व यूजर्सकडून मस्क पैसे घेऊ शकतात. प्लॅटफॉर्मने आपल्या अहवालात असेही म्हटले आहे की मस्क सर्व ट्विटर वापरकर्त्यांकडून सदस्यता शुल्क आकारण्याची योजना आखत आहेत. आतापर्यंत केवळ ब्लू टीक असलेल्यांनाच पैसे लागतील, असे सांगितले जात होते. पण, आता सर्वच युजर्सला पैसे लागणार असल्याचे स्पष्ट होत आहे.
नुकत्याच झालेल्या कंपनीच्या बैठकीत सर्व वापरकर्त्यांकडून सबस्क्रिप्शन शुल्क आकारण्याच्या मुद्द्यावर चर्चा झाली. असेही सांगण्यात येत आहे की कंपनी महिन्यातील काही दिवस यूजर्सना मोफत ट्विटर ऑफर करेल. यानंतर, ट्विटर वापरण्यासाठी वापरकर्त्यांना निश्चित सदस्यता शुल्क द्यावे लागेल.
ट्विटरमधील हा नवा बदल कधी लागू होईल, याबाबत निश्चितपणे काहीही सांगता येत नाही. आत्तापर्यंत, कंपनीचे अभियंते ट्विटर ब्लू सबस्क्रिप्शनच्या जागतिक रोलआउटवर काम करत आहेत. अशा परिस्थितीत, असा अंदाज आहे की सर्व वापरकर्त्यांना सदस्यता शुल्क आकारण्यास काही आठवडे किंवा महिने लागू शकतात.
मस्कने काही दिवसांपूर्वी ट्विटर विकत घेतले. कंपनीचा मालक झाल्यापासून मस्कने मोठे बदल करायला सुरुवात केली आहे. यामध्ये व्हेरिफाईड अकाउंटसाठी (ब्लू टीक) सबस्क्रिप्शन चार्जची घोषणा करण्यात आली आहे. ७.९९ डॉलर दरमहा पैसे घेतले जात आहेत. कॅनडा, अमेरिका, यूके, ऑस्ट्रेलिया आणि न्यूझीलंडमध्ये सदस्यता शुल्क नुकतेच सुरू झाले आहे. भारतातही लवकरच पैसे घेतले जाणार आहेत.
Twitter All Users Pay to Money Musk Hint
