इंडिया दर्पण ऑनलाईन डेस्क – करण जोहरच्या शोमधून अनेक सेलिब्रेटींची वैयक्तिक आणि खासगी गुपितं उघड होतात. या शोचा ७ वा सीझन नुकताच डिस्ने प्लस हॉटस्टारवर प्रसारित झाला. हा शो इतरही वेगवेगळ्या कारणांनी सोशल मीडियावर चर्चेत राहिला आहे. या शोबद्दल दोन गोष्टी सर्वाधिक चर्चेत असतात ते म्हणजे शोचा ‘रॅपिड फायर राउंड’ आणि रॅपिड फायर जिंकल्यानंतर मिळणारं गिफ्ट हॅम्पर. हे हॅम्पर जिंकण्यासाठी सेलिब्रेटी शोमध्ये भांडताना आणि अतिशय मजेशीर उत्तरे देताना दिसतात. या हॅम्परमध्ये नक्की काय असतं याबाबत सर्वांनाच उत्सुकता आहे.
करण जोहरच्या ‘कॉफी विथ करण’ शोमध्ये दिलं जाणारं गिफ्ट हॅम्पर अनेकांसाठी कुतुहलाचा विषय आहे. कोट्यवधीची संपती असलेल्या कलाकारांनाही याचा मोह आवरत नाही. करणकडून दिल्या जाणाऱ्या या हॅम्परमध्ये नक्की काय असतं, याची सर्वांनाच उत्सुकता असते. नुकत्याच एका व्हिडीओमध्ये करण जोहरने याविषयीचा खुलासा केला आहे.
करण जोहरने त्याच्या सोशल मीडियावर एक व्हिडिओ शेअर केला आहे, ज्यामध्ये तो या हॅम्परमध्ये दिलेल्या सर्व गोष्टी सांगत आहे. हिऱ्यांच्या दागिन्यांपासून ते खव्याच्या मिठाईपर्यंत अनेक वस्तू या हॅम्परमध्ये दिल्या जातात. करण जोहरचा ज्वेलरी ब्रँड, मार्शल एक्टन II स्पीकर्स, ऑडी एस्प्रेसो मोबाइल, अमेझॉन इको शो १०, वाहदम टी अँड टी मेकर सेट, न्यूहॉस चॉकलेट्स कलेक्शन डिस्कवरी बॉक्स, बॉम्बे स्वीट शॉप, खोया स्वीट, २८ बेकर स्ट्रीट, कॉफी विथ करणचा कॉफी कप ही सर्व गिफ्ट सेलिब्रिटींना दिले जातात.
‘कॉफी विथ करण’च्या सातव्या सीझनमध्ये रणवीर सिंह, आल‍िया भट्ट, कतरीना कैफ, स‍िद्धार्थ मल्‍होत्रा, विक्‍की कौशल, सारा अली खान, जान्हवी कपूर, अनन्‍या पांडे, सामंथा रुथ प्रभू, अक्षय कुमार, क‍ियारा आडवाणी, शाह‍िद कपूर यांनी सहभाग घेतला होता. या कलाकारांचे एपिसोड यंदा बरेच गाजले होते.
TV Show Coffee With Karan Gift Hamper Surprise
