सुरगाणा – तालुक्यातील अतिदुर्गम भागातील आमझर येथील पशुपालक चिंतामण गंगाजी वाघमारे वय ४७ या इसमाच्या तेरा बक-यांवर वाघाने हल्ला करुन नरडीचा घोट घेऊन मारून टाकल्या. या बाबत समजलेले वृत असे की,रविवार (दि.४) रोजी आमझर गावात आदिवासी पारंपरिक पद्धतीने रानभाजी तेरा खाण्याचा सण होता. त्यामुळे पशुपालकाने जंगलात चारण्याकरीता घेतलेल्या पंधरा ते वीस बक-या जंगलात सोडून तो सण असल्याने निघून आला. नेहमी प्रमाणे अंधार पडला की बक-या जंगलातून घराकडे परतायच्या मात्र शेतातील झापावर बक-या परतल्याच नाहीत. तेरा बक-या जंगलातील भोवर हेदीचा दरा येथेच राहिल्या याच द-यात खडकाची कपार असल्याने
वाघाचा(आदिवासी बोलीत टेंभुरुण्या खड्या)चा अधिवास असतो. रात्रीच्या सुमारास बक-यांच्या कळपावर अचानकपणे हल्ला चढवून नरडीचा घोट घेत मारुन टाकल्या. यापैकी अकरा बक-या ह्या एका जागेवर मृतावस्थेत आढळून आल्या तर दोन बक-यांचा अजूनही तपास लागलेला नाही. शेतक-याचे हजारो रुपयाचे नुकसान झाले आहे.
हा भाग गुजरात राज्याचा सिमावर्ती भागा लगतचा राखीव जंगलाचा आहे. त्यामुळे अशा घटना पावसाळ्यात नेहमीच घडत असतात.काही दिवसापुर्वी याच शेतक-याचा गायीचा गो-हाचा फडशा पाडला होता. सदर घटनेचा वनविभागाचे वनपरिक्षेत्र अधिकारी देवेंद्र ढुमसे यांनी घटना स्थळी भेट देऊन पाहणी केली असून पंचनामा करण्यात आला आहे. तर पशुवैद्यकीय अधिकारी डॉ.ललिता नाळे यांनी शवविच्छेदन केले असून अहवाल वनविभागाकडे पाठविण्यात येणार असल्याचे त्यांनी सांगितले. वनविभागाने वाघाचा बंदोबस्त करावा अशी मागणी ग्रामस्थांनी केली आहे.
आमजर येथील ज्येष्ठ नागरिक परशराम भोये यांनी सांगितले की. वाघ बक-या सोबत ‘ससुली’ हा खेळ खेळत असतो त्यावेळी जेवढ्या बक-या तावडीत सापडल्या तेवढ्या फक्त मारून टाकतो. काहीचे फक्त रक्त पित असतो. त्या पैकी एक ते दोनच खातो. शिकारीचे कौशल्य विकसित करण्याची संधी वाघाला मिळते त्यालाच आदिवासी बोलीत ससुली खेळणे असे म्हटले जाते. लहान मुले पण आदिवासी भागात वाघ बकरीचा खेळ म्हणून ससुली खेळ खेळत असतात. या भागात तरस आढळून येतो त्याला आदिवासी भाषेत पडगांड्या किंवा गदड्या म्हणतात. दुसरी जात कुतर खाया म्हणजे कुत्रे, कोंबडी यांची करतो तर मोठ्या वाघाला टेंभुरुण्या असे म्हणतात तो बक-या, गाय, म्हैस, गायीचे गो-हे यांची शिकार करतो. दुसरी जात मांज-या आहे. या जाती या भागात आढळून येतात.
