पुणे (इंडिया दर्पण वृत्तसेवा) – आंतरराष्ट्रीय पातळीवर ख्यात असलेले आणि शिक्षणाची पंढरी म्हणून ओळखल्या जाणाऱ्या सावित्रीबाई फुले पुणे विद्यापीठात अश्लील गाण्याचे शूटिंग झाल्याचा धक्कादायक प्रकार घडला आहे. यामुळे सर्वत्र खळबळ उडाली आहे. याप्रकरणी शुभम जाधव या तरुणांवर चतु:श्रृंगी पोलीस ठाण्यात गुन्हा दाखल करण्यात आला आहे.
रॉकसन नावाचे यूट्यूबवर चॅनेल असून त्यावर हे रॅप गाणे अपलोड करण्यात आले होते. या गाण्यांमध्ये शुभम जाधव हा गाण्याचे सादरीकरण करतो आहे. शुभम जाधवचं हे रॅप साँग काही दिवसांच्या आधी व्हायरल झाले. त्या गाण्यात काही शिवराळ शब्दांचा वापर करण्यात आला आहे. तर काही दृश्यांमध्ये शुभमच्या हातात पिस्तूल आणि तलवार सारखी हत्यार दिसत आहे. अत्यंत वाईट गोष्ट म्हणजे काही दृश्यांमध्ये विद्यापीठाच्या मुख्य इमारतीमधल्या एका खोलीत आलिशान खुर्च्यांवर बसून शुभम रॅप म्हणत आहे. सदर गाणे व्हायरल झाल्यानंतर राष्ट्रवादीच्या विद्यार्थी शाखेकडून विद्यापिठाला एक पत्र लिहिण्यात आलं आणि अशा प्रकारचे शुटिंग करायला विद्यापीठाने परवानगी कशी दिली यासंदर्भात विचारणा करण्यात आली.
सावित्रीबाई फुले पुणे विद्यापीठात रॅप गाणे चित्रीत केल्याच्या प्रकरणाच्या चौकशीसाठी माजी पोलीस महासंचालक डॉ. जयंत उमराणीकर यांच्या अध्यक्षतेखाली उच्चस्तरीय चौकशी समिती स्थापन करण्यात आली आहे. या प्रकरणाची सखोल चौकशी करून महिन्याभरात अहवाल सादर करण्याचे निर्देश कुलगुरू डॉ. कारभारी काळे यांनी समितीला दिले.
विशेष म्हणजे विद्यापीठाच्या मुख्य इमारतीच्या पार्श्वभूमीवर आणि अंतर्गत भागात चित्रीत केलेल्या सल्तनत या गाण्यात मद्य, पिस्तुल, तलवार अशा साहित्याचा वापर करण्यात आल्याचे निदर्शनास आले. रॅप शैलीच्या या गाण्यात शिव्या आणि आक्षेपार्ह शब्दांचा वापर असल्याची कुलगुरूंकडे लेखी तक्रार नोंदवली गेली असून विद्यापीठाने या गाण्याच्या चित्रीकरणासाठी परवानगी दिली नसल्याचे स्पष्ट केले. या प्रकरणी विद्यापीठाकडून पोलिसात तक्रार देण्यात आल्यानंतर पोलिसांनी गुन्हा दाखल केला.
या संदर्भात विरोधी पक्ष नेते व राष्ट्रवादी काँग्रेसचे नेते अजित पवार यांनी राज्य शासन आणि राज्यपालांकडे पत्र पाठवले आहे, अजित पवार आपल्या पत्रात म्हणतात, सावित्रीबाई फुले पुणे विद्यापीठाला आणि विद्यापीठ वास्तुला फार मोठा इतिहास आहे. असे असताना या विद्यापीठाच्या मुख्य इमारतीत, अधिसभा भरते त्या ठिकाणी अश्लील भाषेतील रॅप सॉंगचे शूटिंग झाल्याची धक्कादायक बाब उघडकीस आली आहे. या घटनेची शासन स्तरावर दखल घेण्यात यावी.
याच प्रकरणात धक्कादायक बाब अशी की, या गाण्यात जो आगीचा सीन आहे. हा सीनदेखील पुणे विद्यापीठातील परिसरात शुट केल्याचे समोर आले आहे. आग वाढल्याने अग्निशमन दलाला बोलवण्याची वेळ विद्यापीठ प्रशासनावर आली होती. मात्र इतका गंभीर प्रकार घडून देखील गाणं व्हायरल झाल्यावर हा सगळा प्रकार समोर आला. रॅपर शुभम यानेदेखील शुटींगसाठी कुलसचिव प्रफुल्ल पवार यांनी तोंडी परवानगी दिल्याचा दावा केला आहे. त्यानंतर आता दोघांचीही सखोल चौकशी करण्यात येणार आहे.
https://twitter.com/ShashiBelgawakr/status/1647121518491734016?s=20
SPPU Pune University Rap Song Shooting
