मुंबई (इंडिया दर्पण वृत्तसेवा) – पत्रा चाळ प्रकरणाच्या तपासाच्या तडाख्याला सामोरे जाणारे शिवसेना खासदार संजय राऊत यांना दिलासा मिळताना दिसत नाही. त्यांच्या कोठडीत १० ऑक्टोबरपर्यंत वाढ करण्यात आली आहे. एक हजार कोटींहून अधिक रुपयांच्या पत्रा चाळ जमीन घोटाळ्याची अंमलबजावणी संचालनालय (ईडी) चौकशी करत आहे. याशिवाय या प्रकरणातील अन्य संबंधितांचीही चौकशी सुरू आहे. त्यामुळे संजय राऊत हे शिवसेनेच्या दसरा मेळाव्याला उपस्थित राहणार नसल्याचे स्पष्ट झाले आहे.
यापूर्वी, या प्रकरणाची १९ सप्टेंबर रोजी प्रिव्हेन्शन ऑफ मनी लाँडरिंग ऍक्ट (पीएमएलए) विशेष न्यायालयात सुनावणी झाली होती. त्यादरम्यान राऊत यांच्या कोठडीची मुदत १४ दिवस वाढवण्यात आली होती. पत्राचाळ पुनर्विकास प्रकल्पात आर्थिक अनियमितता केल्याप्रकरणी तपास यंत्रणेने राऊतला १ ऑगस्ट रोजी अटक केली होती. यापूर्वी २८ जून रोजीही त्यांना ईडीने चौकशीसाठी बोलावले होते. ऑगस्टमध्ये राऊत यांच्या पत्नी वर्षा राऊत याही चौकशीसाठी तपास यंत्रणेसमोर हजर झाल्या होत्या.
राऊत यांच्या निवासस्थानी छापेमारी दरम्यान ११.५० लाख रुपये जप्त करण्यात आले. यानंतर काही वेळातच त्यांना घोटाळ्याप्रकरणी अटक करण्यात आली. या वर्षी एप्रिलमध्येही ईडीने ११.१५ कोटी रुपयांची मालमत्ता जप्त केली होती. यामध्ये त्यांच्या पत्नीच्या नावावर दादरमध्ये एक फ्लॅट आणि अलिबागजवळ आठ जमिनीचा समावेश आहे. या जमिनीत स्वप्ना पाटकर यांचाही हिस्सा आहे.
Shivsena MP Sanjay Raut Dasara Melava
ED Custody
