नाशिक (इंडिया दर्पण वृत्तसेवा) – शिवसेनेत बंडखोरी करणाऱ्या शिंदे गटात पुन्हा एकदा नाराजीनाट्य पहायला मिळत आहे. जिल्ह्यातील नांदगावचे आमदार सुहास कांदे हे याच नाराजीतून चर्चेत आले आहेत. यापूर्वी कांदे यांनी महाविकास आघाडी सरकारमधील पालकमंत्री छगन भुजबळ यांच्याविरोधात दंड थोपटले आहे. आता कांदे यांनी सध्याचे पालकमंत्री दादा भुसे यांच्यावर आरोपांच्या फैरी झाडल्या आहेत. त्यामुळे संपूर्ण राज्याचे लक्ष त्याकडे वेधले गेले आहे.
एकनाथ शिंदे यांच्या नेतृत्वात शिवसेनेमध्ये बंड करण्यात आले. या बंडात नाशिक जिल्ह्यातील मालेगाव बाह्यचे आमदार आणि तत्कालिन कृषी मंत्री दादा भुसे यांच्यासह नांदगावचे आमदार सुहास कांदे यांचाही समावेश होता. सुहास कांदे यांचे नाराजीनाट्य महाविकास आघाडी सरकारमध्येही गाजले होते. त्यांनी तत्कालिन पालकमंत्री छगन भुजबळ यांच्यावर गंभीर आरोप करीत थेट उच्च न्यायालयाचा रस्ता धरला होता. भुजबळांकडून पालकमंत्रीपद काढून घेण्याची मागणीही त्यांनी केली होती. त्यामुळे ही बाब राज्यभरातच चर्चेची ठरली. तत्कालिन मुख्यमंत्री उद्धव ठाकरे यांच्यापर्यंत ही बाब गेली. त्यानंतर सामोपचाराने या वादावर पडदा टाकण्यात आला. त्यानंतर राज्यामध्ये सत्तांतर झाले. कांदे यांनी शिंदे यांचे नेतृत्व मान्य केले. आता शिंदे-फडणवीस सरकारला राज्यात १०० दिवस होत नाही तोच कांदे यांचे नाराजीनाट्य पुन्हा समोर आले आहे.
कांदे हे आता सध्याचे पालकमंत्री दादा भुसे यांच्यावर नाराज असल्याचे दिसून येत आहे. तशी स्पष्ट माहिती त्यांनी दिली आहे. कांदे सध्या कुठल्याही सार्वजनिक कार्यक्रमात दिसत नाहीत. यासंदर्भात त्यांना विचारले असता ते म्हणाले की, भुसे हे आमदारांना विश्वासात घेत नाहीत. बैठकांना बोलवत नाहीत. एकनाथ शिंदे यांच्या नेतृत्वावर माझा विश्वास असून मरेपर्यंत मी शिंदे गटातच राहणार असल्याचे कांदे यांनी म्हटले आहे. तसेच, नाशिक जिल्ह्यातील शिंदे गटाच्या पदाधिकाऱ्यांमध्येही लवकरच बदल होणार असल्याचे सूतोवाच त्यांनी केले आहेत.
याप्रकरणी पालकमंत्री दादा भुसे यांना विचारले असता ते म्हणाले की, आम्ही सर्व एकदिलाने काम करीत आहोत. कुणीही चुकीचा अर्थ काढू नये, असे भुसे यांनी सांगितले आहे. दरम्यान, कांदे यांच्या नाराजीनाट्याची सध्या जोरदार चर्चा होत आहे. भुसे यांनी कालच जिल्हा परिषदेसह ग्रामीण भागातील विविध कामकाजांचा आढावा घेतला. या बैठकीला कांदे अनुपस्थित होते.
Shinde Group MLA Suhas Kande Displeasure
Nashik Nandgaon Shivsena Politics
