नाशिक (इंडिया दर्पण वृत्तसेवा) – गिरणा गौरव प्रतिष्‍ठान, नाशिक यांच्‍या वतीने नाशिकमध्‍ये येत्‍या १४ व १५ जानेवारी रोजी, अखिल भारतीय शेकोटी लोककला साहित्‍य संमेलन, २०२३ चे आयोजन करण्‍यात आले असून कमलाकर (आबा) देसले साहित्‍य नगरी, भावबंधन मंगल कार्यालय, मखमलाबाद रोड, पंचवटी, नाशिक येथे पार पडत असलेल्‍या या संमेलनात साहित्‍य रसिकांसाठी तसेच लोककलेच्‍या आस्‍वादकासांठी भरगच्‍च कार्यक्रमाचे आयोजन करण्‍यात आले आहे. थंडीचा पारा घसरत असतांनाच्‍या या नेमक्‍या कालावधीत होत असलेले हे शेकोटी संमेलन साहित्‍य आणि लोककलेची आवड असलेल्‍या नाशिककरांसाठी एक मोठी मेजवानी ठरण्‍याची अपेक्षा आहे. ‘साहित्‍य ज्ञानाचे आगर, करू लोककलेचा जागर’ हा या संमेलनाच्‍या आयोजनामागचा मुख्य हेतू आहे.
ज्‍येष्‍ठ समीक्षक डॉ.शंकर बोराडे यांची या संमेलनाच्‍या अध्‍यक्षपदी निवड करण्‍यात आली असून ज्‍येष्‍ठ लोककलावंत डॉ. गणेश चंदनशिवे यांच्‍या हस्‍ते या संमेलनाचे उद्घाटन करण्‍यात येईल. गझल कट्टा, शेकोटी कवी संमेलन, कथाकथन, अहिराणी कवी संमेलन, बालकवी संमेलन, महिला परिसंवाद आणि आमत्रितांचे कवी संमेलन हे साहित्‍य क्षेञाशी निगडीत असलेले नित्‍याचे कार्यक्रम या संमेलनात तर होणार आहेतच. परंतु, त्‍याचबरोबर महाराष्‍ट्राची लोकधारा, धिंडवाळी गाणे, ढाक वाद्य, पावरी नृत्‍य, जागरण गोंधळ, तळी भरणे इ. लोककलांवर आधारीत आगळे वेगळे कार्यक्रम, हे या संमेलनाचे खास आकर्षण ठरणार आहेत. याखेरीज काही साहित्‍यिक तसेच लोककलावंत यांना विविध पुरस्‍कार देवून या संमेलनात सन्‍मानित देखील करण्‍यात येणार आहे.
