इंडिया दर्पण ऑनलाईन डेस्क
ठाकरे गटाने शिवसेनेतून हकालपट्टी केल्यानंतर सुधाकर बडगुजर यांना भाजपने काल पक्षप्रवेश दिला. त्यानंतर खा.संजय राऊत यांनी भाजपवर जोरदार निशाणा साधला. ते म्हणाले की, भाजप हा बकवास पक्ष आहे, ढोंगी आणि भ्रष्ट लोकांचा हा पक्ष आहे. या पक्षा इतका देशद्रोही पक्ष देशाच्या इतिहासात कधी झाला नाही. देशद्रोही हा शब्द त्यांना लागू पडतो. कारण सगळे देशद्रोही, भ्रष्ट लोक त्यांनी आपल्या पक्षात घेतलेले आहेत. ज्यांच्यावर त्यांनी देशद्रोहाचे आरोप केले, भ्रष्टाचाराचे आरोप केले असे सगळे देशद्रोही लोक त्यांनी पक्षात घेतले आहेत. उदया दाऊद इब्राहीमला सुध्दा मुस्लिमांचे मत हवी म्हणून ते पक्षात आणतील. या लोकांचा काहीच भरोसा नाही. पाकिस्तान सोबत काहीतरी डील करतील दाऊद इब्राहिम, छोटा शकील, टायगर मेमन यांना भाजप आपल्या पक्षाला घ्यायला मागेपुढे पाहणार नाही असा घणाघातही त्यांनी केला.
ते पुढे म्हणाले की, भाजप हा देशद्रोही पक्ष आहे. राष्ट्रवाद आणि देशभक्ती हे भाजपसाठी फक्त डोळ्यात धूळफेक आहे. हा पक्ष आता अटलजी आणि लालकृष्ण अडवाणीजींचा नाही. तो आता उद्योगपतींचा आहे. काल भाजपने आमच्या एका सदस्याला सामील केले, ज्याच्यावर ते आधी देशद्रोहाचे आरोप करत होते. आता, देशद्रोही पक्ष कोण आहे? हा आमचा नाही तर तुमचा पक्ष आहे, जो देशद्रोही आहे.
गृहमंत्री फडणवीस तुमचे लोक त्या सलीम कुत्ताला उगाच बदनाम करीत होते. भारतीय जनता पक्ष हा निर्लज्ज लोकांचा भरणा असलेला पक्ष आहे, देशभक्ती, हिंदुत्व वगैरे सगळे ढोंग आहे!
