हिंमत हारु नका… मेकॅनिकच्या कन्येची ऐतिहासिक भरारी… सानिया बनणार हवाई दलात पहिली मुस्लिम महिला फायटर पायलट

मुकुंद बाविस्कर, इंडिया दर्पण वृत्तसेवा
गगनात भरारी घेण्यासाठी पंखात बळ तसेच इच्छाशक्ती आणि जिद्द असेल, तर निश्चितच आकाशालाही गवसणी घालता येते असे म्हटले जाते की, उत्तर प्रदेशातील एका सर्वसामान्य कुटुंबातील मुलीने आपल्या इच्छाशक्तीच्या जोरावर हवाई दलात असेच उल्लेखनीय यश मिळवले आहे, याचीच आता सर्वत्र चर्चा सुरू आहे. मिर्झापूरची सानिया मिर्झा ही पहिली मुस्लिम महिला फायटर पायलट होणार आहे.
सानियाने गुरू नानक गर्ल्स इंटर कॉलेज, मिर्झापूरमधून बारावीची परीक्षा उत्तीर्ण केली असून ती यूपी बोर्डात जिल्हा टॉपर आहे. त्यानंतर तिने दि. १० एप्रिल रोजी एनडीए २०२२ ची परीक्षा दिली. परीक्षा उत्तीर्ण झाल्यानंतर तिने मुलाखतीची तयारी करण्यासाठी अकादमीमध्ये प्रवेश घेतला. आता सानिया दि. २७ डिसेंबर २०२२ रोजी पुण्यातील खडकवासला एनडीएमध्ये सामील होणार आहे.

उत्तर प्रदेशातील मिर्झापूरच्या देहत हद्दीतील जसोवर या छोट्याशा गावची रहिवासी आहे. सानियाने एनडीए परीक्षेत १४८ वा क्रमांक पटकावला आहे. सानिया हीने गुरू नानक गर्ल्स इंटर कॉलेज, मिर्झापूरमधून बारावीची परीक्षा उत्तीर्ण केली आहे. तर व्यवसायाने टीव्ही मेकॅनिक असलेले सानियाचे वडील शाहिद अली म्हणाले, ‘सानिया मिर्झा देशाची पहिली फायटर पायलट अवनी चतुर्वेदीला आपला आदर्श मानते. पहिल्यापासूनच तिला त्याच्यासारखं व्हायचे होते. सानिया ही देशातील फायटर पायलट म्हणून निवड झाली दुसरी मुलगी आहे.

सानियाची आई तबस्सुम मिर्झा म्हणाली, ‘आमच्या मुलीने आम्हाला आणि संपूर्ण गावाला अभिमान वाटला आहे. फायटर पायलट होण्याचे स्वप्न पूर्ण करून तिने आपल्या गावातील प्रत्येक मुलीला प्रेरित केले आहे. खरे म्हणजे सानिया पहिल्यांदा ही परीक्षा उत्तीर्ण होऊ शकली नाही, त्यामुळे तिने पुन्हा परीक्षा दिली. या संदर्भात सानिया म्हणाली की, मला नेहमीच फायटर पायलट बनायचे होते. सानियाचा प्रेरणास्रोत अवनी चतुर्वेदी ही देशातील पहिली महिला पायलट आहे. पहिल्यापासूनच तिला त्याच्यासारखे व्हायचे होते.

विशेष म्हणजे, नॅशनल डिफेन्स अकादमी २०२२ च्या परीक्षेत पुरुष आणि महिलांसाठी एकूण ४०० जागा होत्या, ज्यामध्ये १९ जागा महिलांसाठी होत्या. त्याच वेळी, यापैकी २ जागा लढाऊ वैमानिकांसाठी राखीव होत्या. या दोनपैकी एक जागा सानिया मिर्झाने मिळवली आहे. सध्या सानिया मिर्झाचे सगळीकडे कौतुक सुरू आहे. पहिली महिला पायलट अवनी चतुर्वेदीच्या प्रेरणेने सानिया मिर्झाने हे स्थान मिळवले आहे, सानिया मिर्झाला पहिल्यांदा यश मिळाले नाही पण तिने हार मानली नाही आणि दुसऱ्यांदा ही कठीण परीक्षा उत्तीर्ण करून आपले नाव कमावले आहे.

https://twitter.com/Abdul_Ajij_/status/1606622773279092737?s=20&t=s_7MGR1xabcp6AwlFp_img

Sania Mirza First Indian Muslim Women Fighter Pilot