नाशिक (इंडिया दर्पण वृत्तसेवा)- निफाड तालुक्याची प्रमुख अर्थवाहिनी असलेल्या ओझर मर्चंट बँकेचे विद्यमान चेअरमन राजेंद्र दत्तात्रय शिंदे यांचे संचालक पद जिल्हा उपनिबंधक यांनी रद्द करत त्यांना पदावरून काढून टाकले आहे.
याबाबत सविस्तर वृत्त असे की महाराष्ट्र शासनाच्या सहकार कायद्यांतर्गत एक व्यक्ती एक पद हे शासकीय नियम असताना एकच वेळी दोन सहकारी संस्थेत राजेंद्र शिंदे जबाबदाऱ्या सांभाळत होते. सदर गंभीर बाब सुदर्शन सारडा यांनी जिल्हा उपनिबंधक यांच्याकडे तक्रारीद्वारे उघडकीस आणली असता उपनिबंधक फयाज मुलानी यांनी याबाबत शिंदे यांच्याकडे खुलासा मागीतला. त्यानंतर दोघांचे म्हणणे ऐकून घेत युक्तिवाद झाला असता सन २०२२ मध्ये ओझर मर्चंट बँकेची निवडणूक प्रक्रिया सुरू असताना राजेंद्र शिंदे हे पिंपळगाव येथील अशोकराव बनकर पतसंस्थेचे देखील संचालक होते. त्यामुळे मर्चंट बँकेत त्यांचा अर्ज वैध होण्यासाठी त्यांना बनकर पतसंस्थेचा राजीनामा देणे अनिवार्य होते.
अशावेळी शिंदे यांनी बनकर पतसंस्थेचा राजीनामा दिल्याची प्रत आणि पतसंस्थेचा ठराव निवडणूक निर्णय अधिकाऱ्यांकडे जमा करत आपला ओमको बँकेतील निवडणूक अर्ज वैध ठरवून घेत संचालकपदी विराजमान झाले. परंतु सदर पतसंस्थेच्या पुढील वार्षिक अहवाल छापला असता आणि राजीनाम्याची ठराव नक्कल ही उपनिबंधकाकडे सादर न केल्याने शिंदे यांचे संचालक पद कायम असल्याचे सिद्ध झाले. यामुळे एकाच वेळी दोन ठिकाणी पद उपभोगत असल्याने हा स्वतःच्या लाभासाठी शासन नियमांचा उल्लंघन असल्याचे निष्पन्न झाले.
याबाबत दोन्ही कडील म्हणणे मांडून उपनिबंधक यांनी सुनावणी घेत निकाल राखून होता. अखेरीस पोटनियम व अधिनियमातील उक्त तरतुदीप्रमाणे दोषारोप सिद्ध असल्याने शिंदे हे दोन पात्र नसताना दोन ठिकाणी पद भोगत असल्याचे फैयाज मुलानी यांनी निरीक्षण नोंदवत राजेंद्र शिंदे यांना संचालक पदावरून हटवण्याचे आदेश जारी केले आहे. सदर आदेशाची प्रत संघीय संस्था म्हणून नाशिक जिल्हा नागरी बँक्स असोसिएशन यांना पाठवण्यात आली येत महाराष्ट्र सहकारी संस्था अधिनियम प्रमाणे संचालक तथा अध्यक्ष राजेंद्र दत्तात्रय शिंदे यांना काढून टाकल्याचे नमूद केले आहे.
