नवी दिल्ली – राफेल या लढाऊ विमानाच्या सौद्यात दलाली मिळाल्याच्या आरोपाने भारत आणि फ्रांसमध्ये पुन्हा एकदा आरोप-प्रत्यारोपांचा धुरळा उडवून दिला आहे. राफेल डील करण्यासाठी फ्रांसची हवाई वाहतूक कंपनी दसॉने मध्यस्थाला (दलाल) ७.५ लाख युरो इतकी दलाली दिली होती, असा दावा फ्रांसमधील मीडियापार्ट या माध्यम संस्थेच्या वृत्तात करण्यात आला आहे. ही रक्कम बनावट कंपन्या आणि खोट्या बिलांच्या माध्यमातून हस्तांतरित करण्यात आली होती, असाही दावा करण्यात आला आहे.
या डीलमध्ये सुशेन मोहन गुप्ता या दलालाचे नाव समोर आले आहे. या आरोपांनी भारतातील राजकीय वातावरण पुन्हा ढवळून निघाले आहे. भाजपने या प्रकरणाची चौकशी केली नाही असा आरोप काँग्रेसने केला आहे. तर यूपीए सरकारच्या काळातच संगनमत करून सुशेन मोहन गुप्ताने हे काम केले आहे, असा प्रत्यारोप भाजपने केला आहे.
४६ वर्षीय व्यावसायिक सुशेन मोहन गुप्ता यांचे नाव भारतातील संरक्षण आणि हवाई वाहतूक क्षेत्रांशी निगडित असून त्यांचे कुटुंब याच क्षेत्रामध्ये कार्यरत आहे. जुनी दिल्ली येथे स्थायिक झालेल्या गुप्ता कुटुंबीयांचा कपड्यांचा पारंपरिक व्यवसाय होता. परंतु सुशेन यांचे आजोबा बृजमोहन गुप्ता यांनी हवाई वाहतूक क्षेत्रात पाऊल ठेवले. गुप्ता यांनी अनेक संरक्षण आणि हवाई वाहतूक कंपन्यांसोबच्या आंतरराष्ट्रीय करारात महत्त्वाची भूमिका निभावली होती. ब्रिटिश कंपनी वेस्टलँड एअरक्राफ्ट्स, प्रॅट अँड विटनी सह अनेक दिग्गज कंपन्यांसोबत गुप्ता यांनी डील करून दिली होती. बृजमोहन गुप्ता यांच्यानंतर त्यांचा मुलगा देव यांनी कौटुंबिक व्यवसाय म्हणून हाच व्यवसाय सुरू ठेवला. सुशेन मोहन गुप्ता यांच्या रूपाने त्यांची तिसरी पिढी या क्षेत्रात आहे.
दिल्ली येथील अमेरिकन दूतावास शाळेत शिकलेल्या सुशेन मोहन गुप्ता यांनी अमेरिकेतच उच्च शिक्षण घेतले. सुशेन यांनी कुटुंबाच्या हवाई वाहतूक व्यवसायासह आदरातिथ्य (हॉस्पिटॅलिटी) आणि ऊर्जा व्यवसायातही काम सुरू केले होते. सुशेन गुप्ता यांचे नाव २०१० रोजी अतिमहत्त्वाच्या व्यक्तींच्या हेलिकॉप्टर घोटाळ्यादरम्यान समोर आले होते. ऑगस्टा वेस्टलँड कंपनीसोबत त्यांनी ही डील गौतम खेतान आणि व्यावसायिक राजीव सक्सेना यांच्यासोबत करून दिली होती. गौतम खेतान यांचे वडील ओ. पी. खेतान यांचे गुप्ता कुटुंबीयांशी मैत्रीपूर्ण संबंध होते. गुप्ता कुटुंबीयांचे वकील म्हणूनही त्यांनी काम केले होते.
ओ. पी. खेतान यांच्यामुळेच गुप्ता यांची राजीव सक्सेना यांच्याशी ओळख झाली होती. ऑगस्टा वेस्टलँड डीलच्या तपासादरम्यान तिघांना अटक करण्यात आली होती. दिल्लीतील न्यायालयाने सुशेन गुप्ता यांना जामीन मंजूर केला होता. सुशेन गुप्ता यांनी अनेक देशात पसरलेल्या आपल्या बनावट कंपन्यांच्या जाळ्याद्वारे डीलमधील पैसे घेतले होते, असा दावा मीडियापार्टकडून करण्यात आला आहे.