पुणे (इंडिया दर्पण वृत्तसेवा) – नवले ब्रीजवरच्या अपघाताने पुणेकरांना सुन्न केले आहे. ब्रीजवरून उतरताना एकानंतर एक अशा ४८ वाहनांना ट्रकने धडका दिल्याची घटना रविवारी घडली. आता याविषयी महत्त्वाची माहिती समोर आली असून या अपघाताप्रकरणी सिंहगड रोड पोलीस स्टेशनमध्ये वाहनचालकाच्या विरोधात गुन्हा दाखल करण्यात आला आहे.
रविवारी रात्री आठ ते सव्वा आठ वाजेच्या सुमारास हा अपघात झाला. पुण्यातील मुंबई- बंगळुरू हायवेवर नवले ब्रीजवर ही घटना घडली. आंध्र प्रदेशची पासिंग असलेला ट्रक रविवारी रात्री साताऱ्याहून मुंबईच्या दिशेने जात होता. नवले ब्रीज परिसरात दरी पूल ओलांडल्यानंतर ट्रकचं नियंत्रण सुटलं. ब्रीजच्या उतारावरून एकानंतर एक असंख्य वाहनांना धडका देत ट्रक पुढे निघाला. या घटनेत जवळपास ४८ वाहनांना मोठं नुकसान झालं तर १० जण जखमी झाले आहेत.
सातऱ्याकडून मुंबईच्या दिशेने जाणाऱ्या या ट्रकची पासिंग आंध्र प्रदेशची होती. मनीलाल यादव, असे ट्रक चालकाचे नाव असल्याचे पोलिसांच्या माहितीत उघड झाले आहे. हा ट्रक चालक मध्य प्रदेशचा आहे. सिंहगड रोड पोलीस स्टेशनमध्ये त्याच्यावर गुन्हा दाखल झाला आहे. सध्या हा चालक फरार असून पोलीस त्याचा शोध घेत आहेत. ही घटना घडताच काही वेळातच अपघात स्थळी बचावकार्य सुरु झाले. ट्रॅफिक जाम असल्यामुळे अनेक वाहने एकमेकांना खेटून उभी होती. यामुळे अनेक वाहनांमध्ये लोक आणि चालक अडकून पडले. अग्निशमन दलाच्या जवानांसमोर अपघातग्रस्त वाहनांतून चालकांना बाहेर काढण्याचंदेखील आव्हान उभं राहिलं होतं. सोमवारी सकाळपर्यंत अपघातग्रस्त वाहनांना बाजूला सारण्याचं काम सुरु होतं.
आज महत्त्वाची बैठक
सध्या नवले ब्रीजवरील ही वाहने बाजूला काढण्यात आली असून आता हा ब्रीज वाहतुकीसाठी पूर्ववत करण्यात आला आहे. जखमींवर उपचार सुरु आहेत. हा अपघात नेमका का झाला, यासंबंधी महत्त्वाची बैठक नॅशनल हायवे अथॉरिटी ऑफ इंडिया (न्हाई) तर्फे आज सोमवारी बोलावण्यात आली आहे. या बैठकीत वाहतूक कोंडी, पर्याय, अपघात आदींवर चर्चा केली जाणार आहे. या बैठकीत काय निर्णय होतो याकडे सगळ्यांचे लक्ष लागले आहे.
Pune Nawale Bridge Road Accident Today Important Meet
