पुणे (इंडिया दर्पण वृत्तसेवा) – अतिशय हुशार असलेल्या आणि सध्या बारावी सायन्समध्ये शिकत असलेल्या १७ वर्षीय मुलीने महाविद्यालयातील समुपदेशनाच्या कार्यक्रमात मौन सोडले आणि अतिशय धक्कादायक प्रकार त्यानिमित्ताने समोर आले आहेत. घरातीलच रक्ताच्या नात्यांनी तिच्यावर अत्याचार केल्याचे प्रकार या समुपदेशनातून समोर आले आहेत.
सहा वर्षांपासून आपल्यावर होत असलेल्या अत्याचाराची माहिती तिने यावेळी दिली. उत्तर प्रदेशातील मूळ गावाकडे असताना चुलत्याने दमदाटी करून तिच्यावर वर्षभर अत्याचार केला. आजोबांनी वारंवार विनयभंग केला. ही बाब तिने वडिलांना चिठ्ठी लिहून कळविली. मात्र, २०१८मध्ये पुण्यात आल्यावर वडिलांनीही तिच्यावर चार वर्षे अत्याचार केला. या प्रकरणी विश्रांतवाडी पोलिसांनी तिच्या ४९ वर्षांच्या नराधम बापाला अटक केली आहे. हा प्रकार ऐकून पोलिसही सुन्न झाले आहेत. तिच्या आईने मात्र याबाबत काहीच माहिती नसल्याचे सांगितले आहे. या घटनेने सर्वांनाच धक्का बसला असून, मुलीप्रती हळहळ व्यक्त केली जात आहे.
आणखी एका प्रकरणात अटकेत असलेल्या आई- वडिलांना येरवडा कारागृहात भेटण्यासाठी एक अल्पवयीन मुलगी गेली होती. तिच्यावरदेखील तिच्या काकाने लॉजमध्ये नेऊन बलात्कार केल्याचा प्रकार समोर आला आहे. या प्रकरणी काका रोहित गौर याच्याविरुद्ध गुन्हा दाखल केला आहे. या प्रकरणाने संबंधित मुलीला मानसिक धक्का बसला आहे.
Pune Crime Minor Girl Rape Molestation Father Uncle