पुणे (इंडिया दर्पण वृत्तसेवा) – तुम्ही पुणेकर असाल आणि तुमच्याकडे सीएनजी वाहन असेल तर तुमच्यासाठी अत्यंत महत्त्वाचे वृत्त आहे. कारण, पेट्रोल डिलर असोसिएशनच्या वतीने येत्या १ नोव्हेंबरपासून संपावर जाण्याचा निर्णय घेण्यात आला आहे. त्यामुळे पुणे जिल्ह्यात १ नोव्हेंबरपासून अनिश्चित काळासाठी CNG पंप बंद राहणार आहेत. या संपाचा फटका पुणेकरांच्या थेट दैनंदिन जीवनावर होण्याची शक्यता आहे.
शुक्रवारी पुण्यात टोरंट सीएनजी संपाच्या मुद्द्यावर बैठक पार पडली. या बैठकीला जिल्हाधिकारी राजेश देशमुख, एचपीसी, आयओसी, बीपीसीएल आणि टोरेंट गॅसचे कार्यकारी संचालक तसंच पीडीए आणि जिल्हा पुरवठा अधिकाराही देखील हजर होते. या बैठकीत टोरंट सीएनजी पंप चालकांनी आपली मागणी लावून ठरली. विलंबित थकबाकी आणि व्याजासह डीलर्सच्या खात्यात कमिशन जोपर्यंत जमा होत नाही, तोपर्यंत सीएनजी विक्री बंद ठेवण्याचा निर्णय घेण्यात आला आहे.
येत्या २० ऑक्टोबरपासूनच हा संप सुरु होणार होता. पण दिवाळीच्या पार्श्वभूमीवर हा संप ११ दिवसांनी पुढे ढकलण्यात आला आहे. १ नोव्हेंबरपासून बेमुदत संपाचा इशारा देण्यात आला आहे. संपामुळे पुणेकरांचे हाल होण्याची दाट भीती आहे. सीएनजीवर चालणाऱ्या गाड्यांच्या वाहतुकीचे काय होणार, असा प्रश्नही यानिमित्ताने उपस्थित केला जात आहे. दरम्यान, त्याआधीच या संपावर तोडगा काढण्याचीही गरज व्यक्त केली जात आहे.
यापूर्वी केला होता लाक्षणिक बंद
१ ऑक्टोबर रोजी टोरंट सीएनजी पंप चालकांनी एक दिवसांचा लाक्षणिक बंद पुकारला होता. डीलर कमिशनमध्ये वाढ करण्याच्या प्रमुख मागणीसाठी हा लाक्षणिक संप पुकारण्यात आला होता. या संपात ६० सीएनजी पंप चालक सहभागी झाले होते. या संपावेळी टोरंट सीएनजी पंप सोडले, तर इतर पेट्रोल पंप आणि एमएनजीएलकडून पुरवठा केला जाणारे सीएनजी पंप सुरु होते. त्यामुळे या बंदचा तितकाचा फटका पुणेकरांना जाणवला नव्हता.
Pune CNG Supply Petrol Pump Dealer Association