चित्रपटात पिंपळनेरचे विजय चौधरी यांची महत्त्वाची भूमिका
अक्षय कोठावदे,पिंपळनेर
– सिनेमा हा सगळ्यांचाच आकर्षणाचा विषय, आपण सिनेमात काम करावं किंवा सिनेमाचा एक घटक व्हावं असं सगळ्यांचं स्वप्न असतं, परंतु आपण सिनेमाचे निर्माते होऊ अशी शक्यता देखील नसणारे धुळ्याचे भुपेंद्रकुमार नंदन यांच्या कॅफे मराठी निर्मित ‘प्रणय मास्तर’ या मराठी सिनेमाचे संपूर्ण शुटिंग त्यांच्या मूळ गावी नाशिक जिल्ह्यातील सटाणा तालुक्यातील ताहाराबाद या गावात झाले, सदर सिनेमाचा वर्ल्ड टेलिव्हिजन प्रीमिअर रविवार १६ मे रोजी दु.१२ वा. मराठी बाणा या वाहिनीवर प्रक्षेपित होत आहे.
या सिनेमाचे दिग्दर्शक राष्ट्रीय पुरस्कार विजेते दिग्दर्शक शिवाजी लोटन पाटील असून, लेखक शिरीष लाटकर आहेत तर सिनेमात प्रसाद ओक, अर्चना निपाणकर, प्रणव रावराणे, हंसराज जगताप यांच्या प्रमुख भूमिका असून सिनेमाचे निर्माते निखिल रायबोले आणि भुपेंद्रकुमार नंदन आहेत.
निर्माते भुपेंद्रकुमार नंदन हे धुळ्याचे असून स्व. वसंतकुमार नंदन (सिने-पत्रकार) यांचे ते सुपुत्र आहेत. धुळ्यात शिकत असतांनाच भुपेंद्रकुमार यांना कला क्षेत्राची आवड होती, शाळा,कॉलेज मध्ये नाटकात ते सक्रिय होते, पुढे पुण्यात जाऊन ललित कला केंद्र मधून एम.ए. नाट्यशास्त्राची पदवी घेऊन मुंबईत अनेक वर्षे संघर्ष केल्यावर त्यांनी कॅफे मराठी ही निर्मितीसंस्था निखिल रायबोले यांच्यासोबत सुरू केली. त्यांच्या कॅफे मराठी अंतर्गत अनेक मराठी बड्या वेब सिरीज सर्व ओटीटी प्लॅटफॉर्म वर उपलब्ध आहेत.
भुपेंद्रकुमार पुढे सांगतात की, मी मूळ ताहाराबाद गावचा आणि धुळ्यातून शिक्षण घेऊन अनेक वर्षे मुंबईत या कला क्षेत्रात काम करतोय, परंतु पहिला मराठी सिनेमा जेव्हा निर्माण करायची वेळ आली तेव्हा या गोष्टीसाठी एक छोट्या गावाच्या लोकेशनची आवश्यकता होती, आणि निखिल रायबोले यांनी सुचवले की तुमच्याच गावात शुटिंग केले तर, तिकडून ही संकल्पना आली. आणि माझे दिवंगत वडील स्व.वसंतकुमार नंदन यांचे देखील हे स्वप्न पूर्ण झाले.
पिंपळनेर करांसाठीसाठी देखील अभिमानास्पद बाब
शिवाय सिनेमा क्षेत्रात पिंपळनेरचे भूमिपुत्र विजय चौधरी यांची देखील महत्वपूर्ण भूमिका आहे. अभिनेते प्रसाद ओक यांच्या वडिलांच्या भूमिकेत ते आहेत. यापूर्वी देखील त्यांनी अनेक सिनेमात कामं केली आहेत. परंतु या सिनेमात राष्ट्रीय पुरस्कार विजेते दिग्दर्शक आणि बड्या कलाकारां सोबत काम करणे हा अनुभव खूप काही शिकवणारा होता*
अभिनेता विजय चौधरी यांनी यापूर्वी गाजलेले चित्रपट परफेक्ट प्लॅन, बेटी बचाव, बेटी पढाव यावर आधारित दुर्गा अवतरली या मराठी चित्रपटात आपली महत्त्वाची भूमिका बजावली आहे त्यानंतर वाजवू बँडबाजा,गुलाबी* *गोंधळ,येत्या काही दिवसात प्रदर्शित होणारा चित्रपट गावठी राठोड या चित्रपटात देखील विजय चौधरी यांनी इन्स्पेक्टरची भूमिका केली आहे, यांमध्ये देखील आपली महत्वपूर्ण भूमिका बजावली आहे. २०१५ साली पिंपळनेर येथे एका अध्यात्मिक कार्यक्रमात विजय चौधरी यांनी साईबाबांची भूमिका देखील केली होती.
सिनेमाच्या कथेबद्दल अभिनेते नंदन सांगतात की, गावातल्या एका शाळेत एक नवीन शिक्षक रुजू होतात आणि त्यांच्यावर एक धाडसी विषय शिकवण्याची जबाबदारी येते, त्यात शाळेतील काही आगावू मुलं त्यांना कशी बेजार करतात आणि शेवटी तेच सर कसे सगळ्यांचे लाडके सर होतात अशी या सिनेमाची गोष्ट आहे. शाळेतल्या गमती जमती आणि किस्से सोबत लव्हस्टोरी अशी गुंफण यात आहे. तेव्हा हा सिनेमा सगळ्यांनी जरूर बघावा असे आवाहन निर्माते भुपेंद्रकुमार नंदन यांनी केले आहे.
