नाशिक जिल्ह्यातील या ५१ गावांचे रुपडे पालटणार… मॉडेल व्हिलेजसाठी निवड… बघा, तेथे काय काय होणार

नाशिक (इंडिया दर्पण वृत्तसेवा) – पालकमंत्री दादा भुसे यांनी नाशिक जिल्हा परिषदेमधील सर्व पंचायत समित्यांमधून किमान ३ ग्रामपंचायतींची निवड करून सन २०२३-२४ या वर्षापासून केंद्र शासन, राज्य शासन व शासकीय सर्व विभागांच्या ग्राम विकासाशी संबंधित सर्व योजना राबवून सर्वसमावेशक विकास करण्यासाठी “आदर्श गाव योजना” सुरू करून त्याद्वारे “आदर्श ग्रामपंचायत” निर्माण करण्याबाबत या कार्यालयास निर्देश दिलेले होते. त्यानुसार योजना राबविण्याचा निर्णय जिल्हा परिषदेने घेतला असून त्यानुसार “आदर्श गाव योजना” सुरू करण्याबाबत सुचना जिल्हा परिषदेच्या मुख्य कार्यकारी अधिकारी आशिमा मित्तल यांनी परिपत्रकाद्वारे निर्गमित केल्या आहे.

नाशिक जिल्हा परिषदेमधील सर्व पंचायत समित्यांमधून किमान ३ ग्रामपंचायतींची निवड करून सन २०२३-२४ या वर्षापासून केंद्र शासन, राज्य शासन व शासकीय सर्व विभागांच्या ग्राम विकासाशी संबंधित सर्व योजना राबविण्याकरिता सर्वसमावेशक विकास करण्यासाठी “आदर्श गाव योजना” सुरू करण्यात येत आहे. यासाठी सन २०२३-२४ या पहिल्या वर्षाकरिता “स्मार्ट व्हिलेज योजना” आणि “आर. आर. (आबा) पाटील सुंदर गाव पुरस्कार योजना” यात मागील ३ वर्षातील तालुक्यात पहिल्या आलेल्या ग्रामपंचायतींची आणि “सांसद आदर्श गाव योजना (SAGY)” मधील ५१ ग्रामपंचायतींची निवड करण्यात आली आहे. अशी माहिती उपमुख्य कार्यकारी रवींद्र परदेशी यांनी दिली.

या गोष्टींची होणार प्रभावी अंमलबजावणी –
घरकुल योजना, महात्मा गांधी राष्ट्रीय ग्रामीण रोजगार हमी योजना, गावातील सर्व शासकीय इमारतींमध्ये शौचालय बांधणे, गावाचे जल अंदाजपत्रक तयार केले जाणार, सर्व घरांना १००% नळ जोडणी, वृक्ष लागवड, घनकचरा व्यवस्थापन, सांडपाणी व्यवस्थापन, गावात १००% पथदीप एलइडी/ सौर उर्जेवर होणार, पायाभूत सुविधा पुरवल्या जाणार, मासिक सभा, ग्रामसभा, महिला सभा यांची प्रभावी अमलबजावणी, लसीकरण, किशोरवयीन मुलींना प्रशिक्षण, आयुष्यमान भारत गोल्ड कार्ड, मनरेगा जॉब कार्ड, आधार कार्ड, दिव्यांग कार्ड यांचे १००% वाटप, सामाजिक लाभाच्या योजनांची प्रभावी अंमलबजावणी

या गावांचा समावेश –
नाशिक – दरी, मुंगसरे, कोटमगाव, गणेशगाव, माणिकखांब
इगतपुरी – शिरसाठे, मोडाळे, नागोसली
त्र्यंबकेश्वर – वेळुंजे, काचुर्ली, आंबोली, वाघेरा
पेठ – कोपुर्ली बु., शेवखंडी, बोरवठ

सुरगाणा – बुबळी, हातरुंडी, म्हैस खडक
दिंडोरी – करंजवण, कोल्हेर, गोंडेगाव
कळवण – सुळे, नांदुरी, मेहदर
बागलाण – पिंपळदरे, रातीर, नवे निरपुर

देवळा – वरवंडी, खालप, माळवाडी
चांदवड – राजदेरवाडी, हिरापुर, नन्हावे, रायपुर
मालेगाव – निळगव्हाण, बेळगाव, मुंगसे
नांदगाव – बोराळे, श्रीरामनगर, भालुर

येवला – महालखेडा, सायगाव, एरंडगाव खु
निफाड – थेरगाव, आहेरगाव, साकोरे मिग
सिन्नर – वडांगळी, चिंचोली, दातली, किर्तांगळी, ठाणगाव