येवला (इंडिया दर्पण वृत्तसेवा) – जागतिक तपमान वाढ आणि हवामान बदलाची जोरदार चर्चा होत आहे. अवकाळी पावसाच्या अनुभवामुळे तर साऱ्यांच्याच तोंडी एक वाक्य आहे ते म्हणजे निसर्ग चक्र बदलले आहे. याचा प्रत्यय वेळोवेळीही येतच आहे. आता तर पशुप्राण्यांद्वारेही त्याचे संकेत दिसायला लागले आहेत. पावसाळ्यात आनंदाने पिसारा फुलवून नाचणारा मोर आता चक्क कडाक्याच्या उन्हातच हे कृत्य करु लागला आहे. त्यामुळे सर्वत्र आश्चर्याचे वातावरण आहे. या घटनेचा व्हिडिओही व्हायरल झाला आहे.
शेतात पाणी पिण्यासाठी आलेल्या कळपातील एका मोराने चक्क उन्हाळयाच्या दिवसात पिसारा फुलवल्याच दृष्य प्रविण आहेर यांनी आपल्या मोबाईल मध्ये कैद केले आहे. पिसारा फुलवून नाचणा-या मोराचे मनमोहक दृष्य त्यांनी नंतर सोशल मीडियावर शेअर केले आहे.
उन्हाचा पारा सर्वत्रच चाळीशीच्या आसपास पोहचलेला आहे. अशा वेळी वन्यप्राण्यांची पाण्यासाठी सर्वत्रच भटकंती सुरु होते. नाशिक जिल्ह्यातील येवल्याच्या रेंडाळे येथील वन्यप्रेमी प्रविण आहेर यांनी आपल्या शेतात पशू-पक्षी व मोरांसाठी नेहमी प्रमाणे पाण्याची सोय केलेली असून भर उन्हाळयात पाणी पिण्यासाठी मोर, लांडोर यांचे कळप तेथे पाणी पिण्यासाठी सकाळ, दुपार, संध्याकाळ येत असतात. यावेळीच त्यांनी पिसारा फुलवण्याचे दृष्ट कॅमेरात कैद केले आहे.
Nashik Yeola Peacock Dance in Summer Video
